成立兩年嘅大埔水陸墟尋日舉行慶祝活動，請嚟七對夫婦着起婚紗重溫結婚滋味，行政會議成員梁智鴻（金刀梁）及鄉議局副主席張學明都冒雨撐場，搞到西裝、褲腳盡濕。金刀梁「濕身」不忘搞笑，自嘲當年因為荷包「冇水」，結婚時只係求其簽個字，冇搞儀式。
金刀梁認真謙，查實佢出身醫學世家，爸爸就係三十年代名醫梁金齡，家有億元大宅，佢口中嘅簡單婚禮，可能豪過唔少平民百姓都未定。金刀梁又傳授御妻心得，話最緊要做到「水乳交融」，即係無分彼此啱晒Key，千祈咪郁手郁腳打交喎。
張學明都係愛妻之人，尋日拖埋太太陳育蘭亮相，張太大爆老公係「鄉下佬」一名，當年結婚只行中式婚禮，老公戴上卜帽，佢就着傳統裙褂。多年之後，張太個心始終恨影幅婚紗相，尋日開到口向老公詐嬌，終於獲老公點頭，話補影婚紗相可以考慮吓喎。
水陸墟係社企，張學明都係搞手之一，佢報喜話多得市民支持，經營一年半已收支平衡，依家仲有錢袋添，近日佢同政府傾掂數可以做多兩年，等班漁民有多一個就業出路，認真係皆大歡喜喎。