香港總商會理事會換屆，爆出自由黨被逼宮事件，幕幕驚心，生意人鬥法，手起刀落，有時仲狠過政黨傾軋。本地四大商會之一嘅中華廠商聯合會，十月亦到時候改選領導層，一樣有惡鬥，戲碼係廠商會前立法會代表呂明華撼前亞視主席黃保欣次子黃友嘉，不過，各位一心等睇好戲嘅觀眾，可能會失望嘞，據聞廠商會為締造內部和諧，考慮破格冊封未做過會長嘅呂明華做永遠名譽會長，換取呂明華退出爭逐。
親中商會一向重視和諧，不過，上年十月一場立法會選舉，劃破廠商會嘅平靜，廠商會高層有意換人，以林大輝取代七十一歲嘅呂明華，但係呂明華起初堅持唔退，於是會內兩派暗中較勁，其後有人向傳媒爆「黑材料」，指有高官幫林大輝拉票，「唐唐」唐英年捲入漩渦。立法會廠商會代表嘅議席，好耐都未見過咁嘅熱鬧場面，理由一字咁淺，選舉從來係泥巴戰，只要多過一個人落場，就一定有惡鬥，污泥四濺，在所難免。
事先張揚 角逐會長
經歷半年平靜，廠商會又遇波瀾，會長尹德勝年底任滿，會內核心屬意第一副會長黃友嘉接班，部署無風無險平穩過渡，點知殺出程咬金，喺立法會選舉一役最終被逼退嘅呂明華，事先張揚，有意角逐會長，而且聲稱已口頭上獲四十幾位會董支持，佔近一百個會董的一半，廠商會一場內部角力，一觸即發。
討價還價 以物換物
知情者話，呂明華中途殺出，其實係想同廠商會元老討價還價，玩一次「以物換物」遊戲，而目標正係喺會內崇高超然嘅永遠名譽會長之位，理由係自己做咗十年廠商會立法會代表，喺廠商會內嘅江湖地位形同會長，要退都要風風光光。商人求財啫，唔係求氣，以和為貴，聽聞部分廠商會高層有意還呂明華心願，以平息干戈。不過，亦有會內人士指，按廠商會傳統，只有做過會長，好似陳永棋、楊孫西同洪克協咁，先至有資格升上「神枱」，做永遠名譽會長，呢個位唔係話做就做，呂明華係咪如願得償，仲係未知之數。
講開廠商會會長之爭，呢個位每兩年一屆，無連任機制，據聞，全國政協委員施子清兒子施榮懷心懷鴻鵠之志，有意喺兩年後一試實力。一名廠商會元老分析，廠商會內講勢力平衡，福建幫與其他籍貫人士一向輪流揸莊，如果今年黃友嘉當選，由於佢係福建籍人士，同屬福建幫嘅施榮懷想接棒就比較難。