本文重點
旅遊界立法會議員謝偉俊（阿Paul）同「白姐姐」白韻琴上月初情海翻波，當時白姐姐喺記者會爆料，指阿Paul同佢結婚，係另有原因，為佢哋呢段廿載情留下最大問號。事隔近兩個月，阿Paul尋日終於首度開腔，話九七年前同白姐姐喺美國拉斯維加斯註冊，原來係想帶挈白姐姐都享有居英權。
阿Paul尋日透過大氣電波提及同「青島張茆」互發挑情電郵嘅桃色緋聞，指「青島張茆」其實係一位山東朋友嘅世姪女，託阿Paul幫手喺香港搵嘢做，可能女方心急來港出人頭地，所以向阿Paul又寄自拍相，又寫嘢介紹自己，佢同個女仔連面都未見過，「孔雀開屏嘅事更加係虛幻出嚟嘅」。阿Paul又話，唔知邊個咁大膽，將佢同「青島張茆」嘅電郵內容改頭換面，然後再擺上網，造謠生事。佢又承認，最近做咗立法會議員，律師牌又啱啱攞番，一定係冷落咗白姐姐。
兩人關係基本不變
對傳自己同白姐姐係風水婚姻，阿Paul尋日揭開謎團，風水婚姻係假嘅，只不過當年佢申請緊居英權，「想白姐姐都可以受惠」，於是就「喺法律上做啲手續」，當時佢連向白姐姐求婚都慳番，註冊時連結婚戒指都無準備。
至於註冊後嘅生活，阿Paul話二人關係基本不變，維持「男女朋友式交往，多過好似夫妻嘅方式」喎。呢句說話我哋唔敢隨便演繹，留番畀讀者自己心領神會。
卓妮