本文重點
金融海嘯下電視台接連傳出裁員消息，但亞視主席張永霖（Linus）依然好風騷，尋日現身沙田馬場妙論賭馬同女人，佢笑言賭馬多年輸錢居多，但講到輸得最甘，仲係投資喺「胭脂馬」即係女人身上。女人令佢煩透，但話口未完，Linus又自爆再度做「老襯」，宣布同女友早已註冊結婚。
張永霖女友Silvia靜雞雞話畀卓妮知，兩人幾年前已喺加國結婚，不過因為Linus曾結婚兼育有女兒，為免影響對方，兩人未有在港註冊，人前亦只以男女朋友相稱，近年Linus覺得要給「女友」一個真正名分，尋日終於叫卓妮改口稱呼Silvia為張太。
自稱「青樓名妓」嘅Linus宣布告別單身生涯，但轉頭佢又呻笨，話男人最傻就係娶老婆：「你要畀晒身家、財產同埋條命畀佢，你話係咪輸得好慘呢？」真係識晒命！
講起亞視日前再度裁員三十多人，卓妮追問會否再有炒人風暴，Linus大派定心丸話：「今年內都唔會再裁員。」睇怕員工暫時可以鬆一口氣。
張宇人愛駒冇運行
同場仲有熱愛賽馬嘅立法會議員張宇人（Tommy），見佢同馬會行政總裁應家柏咬晒耳仔，以為佢問應Sir攞貼士，原來係「告狀」至真。Tommy話，愛駒「再戰群雄」八個月以來未有機會上陣過，難得尋日有份出戰就遇上狂風暴雨，佢隻馬並唔擅長跑爛地，擺明係冇運行。咁講唔知算唔算係輸錢賴地軟呢？
卓妮