嘩，《明報》唔係自命清高嘅咩，因乜解究陷害李超人咁毒呀？功夫茶開動大腦記憶體，係咁Load係咁Load，終於諗到嘞，今年二月《明報》的而且確害到李超人攤攤腰。
事緣係咁嘅，港交所上市委員會早前推出延長上市公司董事禁售期建議，引起二百間上市公司聯署登報反對。件事嘈咗一輪，上市委員會終於順應民意，暫緩有關建議。好嘞，自稱「公信第一」嘅《明報》遲唔揀早唔揀，偏偏就揀咗暫緩決定公布嘅前一日，派人追訪準備去打高爾夫球嘅李嘉誠，問佢攞意見，然後寫成新聞，令人產生一個錯覺，李超人一開聲，上市委員會即刻跪低。
咁都未算毒，最毒嘅係《明報》寫到實牙實齒，令人以為李超人「隻手遮天」！
隔咗咁耐仲要重提舊事，證明李超人覺得自己畀人屈得好慘。又係㗎，反對嘅有二百間公司，點解係都要夾硬針對其中一個人先？李嘉誠講嘢無疑係好有分量，之不過，上市委員會第二日就公布決定嘞，有乜可能反應快得咁交關呀？
唉，難怪李超人尋日又話，斷章取義仲有啲譜，無中生有先至慘。
講開又講，《明報》雖然認叻認唔切，餐餐自稱「公信第一」，但係佢哋無中生有嘅紀錄確係水蛇春咁長。最經典嗰單係舊年北京奧運閉幕式，當時《明報即時新聞網》有咁嘅報道：「碧咸乘坐倫敦標誌性的雙層巴士出場，然後跳下巴士，踢着足球衝入人群，在代表國際奧委會二百零五個成員的孩子的圍繞下展示自己的球技。他把足球踢向觀眾，由一名工作人員拾得。」
事實係點呢？碧咸只係企喺雙層巴士上一腳將個波踢出去，就係咁多。《明報》居然好似寫小說咁樣加鹽加醋，反映呢份報紙嘅水準真係江河日下，差過舊時好多好多。所謂舊時，即係查良鏞時代，嗰時嘅《明報》，邊會錯得咁離譜㗎？邊會無中生有屈人食死貓㗎？邊使掛個爛鬼招牌「公信第一」嚟呃飯食㗎？
睇睇《明報》嘅「更正與澄清」，你就會發覺有人出錯當食生菜。○七年，《明報》錯咗一百九十三次，其中二十一次道歉。○八年，錯咗一百九十三次，其中二十三次道歉。今年截至四月，已經錯咗六十二次嘞，其中六次道歉。
將軍一去，大樹飄零，《明報》不斷沉淪到如斯田地，既出錯又老屈，計功夫茶話齋，不如換一換招牌，自稱「杜撰第一」好過啦！