許曉暉上任民政事務局副局長時，細女啱啱出世，大女就得嗰三、四歲，不過佢自從做咗官之後，工作量大增，結果同好多職業女性一樣，顧得事業又難免忽略家庭，冇乜時間湊女。
政府行咗五天工作都有一段日子，但許曉暉好多時都周六無休。佢記得有次星期六做完嘢返屋企，「個天仲好光」，點知佢大女竟然好驚訝咁問：「媽咪，做乜咁早返嚟？」原來許曉暉平日放工返屋企，兩個女通常已經瞓咗覺，所以即使喺同一屋簷下，都好少機會可以同囡囡相處。許曉暉雖然話兩個女太細仲未識得詐型，但為人父母當然唔想錯過子女成長嘅每個階段，許曉暉尋日都好無奈話要同老公一齊諗計，睇吓點先可以好好管理時間喎。
平時咁少時間陪小朋友，許曉暉一得閒就會帶囡囡去玩。不過，許曉暉個大女人仔細細，竟然最鍾意去大埔火車博物館，仲對窄軌蒸氣火車頭、柴油電動機車呢類老爺機械情有獨鍾，興趣認真另類，之前帶咗佢哋去咗幾次，以後睇怕仲要去。