裁員之聲未了，亞視日前再度炒人，跟住又輪到無綫電視，成個電視行業人心惶惶，裁員風暴幾時至平息，認真難料。前亞視老闆邱德根就戥被裁嘅員工感到難過，仲話自己主政亞視期間從未炒過一個員工！
邱德根上周末同太太裘錦蘭現身沙田馬場，講起亞視精簡人手，邱生話係個別事件，唔想評論，但話口未完，佢以自豪嘅口脗話，自從八二年入主亞視後，八年間從未裁員，仲話老闆迫不得已下都唔應該炒人，呢句說話唔知係咪想講畀依家啲電視台老闆聽聽？
邱德根雖然從來唔請員工食「無情雞」，但佢畀員工稱為亞視歷來最「慳」嘅老闆，聽聞佢當年限制員工使用廁紙數量，每次如廁不論「大小」，最好只用四格廁紙；員工攞支無墨原子筆來換，亦只能換芯不能整支更換，總之慳得就慳。不過有資深亞視員工就讚賞邱德根係有心搞製作之人，相比之下，如今亞視嘅自家製作就買少見少喎。