本文重點
金管局總裁任志剛出名自負，但尋日佢最後一次以總裁身份向立法會匯報工作時，就一反常態主動向以往畀佢窒過嘅立法會議員耍冧。不過，一講到佢嘅繼任問題，佢就立即回復故我，暗寸佢嘅疑似接班人陳德霖為個人中途走咗去商界搵真銀，又不點名批評煲呔曾同鬍鬚曾冇為進一步發展香港嘅國際金融中心地位，向中央爭取，做好政治層面嘅工作，一次過寸爆雙曾同攞命陳。
任總十月離開已成既定事實，尋日佢出席立法會財經事務委員會時，一開波就主動多謝議員過往對佢同金管局嘅支持，致詞將近結束時，更加臨時爆肚，話過去十多年來，自己喺議會上用言語衝撞到啲議員，希望大家多多包涵；佢仲幫自己戴高帽，強調呢啲言詞只代表佢對自己工作過分熱心。
話無意下海搵真銀
問佢會否好似某啲前高官咁，離任後到私人機構搵真銀？任總亦斬釘截鐵話，無意喺離任後加入任何私人機構。佢又強調自己一心為香港大眾利益，如果離任後仲有需要，好樂意隨時再向港府提供佢嘅專業意見，令兩大反對派民主黨同公民黨都相當滿意。唔通佢想班議員喺嚟緊嘅雷曼事件調查報告中放佢一馬，避免喺數十年嘅公職生涯中留下污點？
不過，當有議員質疑佢冇喺任內做好培養接班人工作，任總就語有所指咁話，其實亦有刻意培養接班人，可惜培養咗出嚟嘅接班人最後決定另謀高就，都冇乜辦法。議員追問係咪講緊曾任金管局副總裁、但中途走咗去私人銀行搵真銀、最後輾轉埋咗煲呔曾碼頭嘅攞命陳，任總就笑笑口話：「我冇回應！」其實佢心裏面嘅真正答案，早已呼之欲出。不過，當年攞命陳離開政府另謀高就，係因為畀人㩒住冇機會發圍，定係為咗高薪厚職，咁就要問過當事人至知喇。
任總除咗暗寸攞命陳，仲寸埋雙曾，事關講到上海同香港嘅國際金融中心之爭，任總話香港必須向中央爭取三件事，包括吸引更多內地企業來港上市，打通兩地嘅Ａ股同Ｈ股市場，以及進一步向香港開放人民幣業務。佢強調金管局早已做好技術層面同政策層面嘅準備工作，但對於直接游說中央開閘放水嘅政治層面工作，自己只就係一名門外漢，有待識搞呢啲嘢嘅人去做，擺明寸緊負責有關工作嘅煲呔曾同鬍鬚曾。任總雖然離開在即，睇嚟心中仲有氣！