經濟不景，但名人愛吃胃口不變。前商務及經濟發展局局長馬時亨（肥亨）近日就迷上清淡新派粵菜，開餐、請客例必去銅鑼灣嘅名人食肆「飯堂」。卓妮八到，呢個取名「飯堂」嘅中式食肆果然名副其實，連醫管局主席胡定旭、馬會大董葉澍堃等政經界名人都慕名幫襯。到底「飯堂」有乜咁巴閉？
卓妮日前貢去「飯堂」八吓，咁啱見到淡出官場養病嘅肥亨喺度歎茶，佢拉住卓妮大談食經，話近年為咗控制血壓積極瘦身，飲食都要少鹽少油，「飯堂」嘅上素蒸粉果、檸檬叉燒酥、生炒莧菜鬆同靚湯至啱佢，「上素蒸粉果」皮薄靚，「檸檬叉燒酥」就鬆化得嚟唔肥膩，連肥亨都讚不絕口。之不過，原來肥亨無辣不歡，尤其鍾情大牌檔梗有嘅「余均益辣醬」。
「飯堂」總經理譚綺玲（玲姐）話，同肥亨識咗十九年，知道佢對呢款傳統辣醬情有獨鍾，上菜前一定識做咁預備一碟喺枱上。無論肥亨請朋友食飯，抑或同屋企聚餐，玲姐都因應不同需要同佢寫好菜單，好似佢太太鍾意清淡菜式，佢大女鍾意片皮鴨，玲姐都巨細無遺照顧周到。玲姐咁細心，肥亨齋食呢份心意都耍冧喇！早兩日肥亨又同深圳東海花園老闆黃楚標、議員林健鋒等一班波友去「飯堂」食飯，果然成日去嗰度開餐。
肥胡貪食材夠新鮮
另一位食家肥胡都有幫襯「飯堂」，佢話貪啲食材夠新鮮，採用有機蔬菜，食得夠健康。葉澍堃就話最欣賞嗰度嘅點心，好正喎。卓妮去嗰日，葉澍堃太太就啱啱同班太太團去「飯堂」食晏。
揼黃坤心口買紅酒
講開肥亨，佢把口唔止識食好嘢，仲好叻氹人捐錢做善事。早前佢為一個籌款晚會做「籌款專員」，除咗即場掏荷包捐咗三萬蚊，仲做埋棟篤笑，幫手揼嘉賓心口。肥亨仲「出賣」老友，拉埋「廚神」黃坤撐場，最後黃坤用咗三萬蚊投咗一支八二年嘅法國紅酒Chateau Haut-Brion，另外再自揼心口捐五萬蚊，冇令肥亨失望。不過，肥亨話呢次揼心口欠咗好多人情債，有排還，下次唔好預佢喎！
卓妮