今年五十六歲的梁錦濠昨作供完畢後，在庭外大爆他和政商界友人一同與陳振聰吃喝玩樂，以及深厚友情。他坦言仍相信風水，而且深信陳振聰「識風水」。「風水係學問，如果係高人做可以幫到你，Tony係識風水嘅，佢跟佢爸爸學到風水學問，嗰本《天圖佈局》好詳細，不過燒咗啦，好似畀王太（龔如心）燒咗。」
龔如心被說入住華懋總部
梁說，當年對陳振聰深信不疑，是因為「佢幫過多人！好似泰國一個總理，當佢仲係將軍時，交咗軍裝畀陳振聰喺半島酒店做法事，幾個月後就做咗總理、平步青雲。」梁又說自己親身經歷陳的能力，「我有個好朋友又有錢又乖，但陳振聰第一眼見佢就話佢唔規矩，喺出面包二奶，我問番朋友，佢都承認有咁既事！」他說聽聞很多客人都在陳的指點下解決到夫妻感情問題。
陳曾告訴梁，他成功說服龔如心從山頂的豪宅住所搬到華懋頂樓住，方便見面討論風水事宜，梁笑說：「佢說服到王太連華懋徽號都改到同振業興隆堂一樣，所以覺得佢說服力好強好犀利！」梁又形容陳振聰「好聰明、好多朋友，對朋友好好、好誠懇，口才又好。」
張鑑泉之死曾惹信心危機
梁錦濠說，家人反對他沉迷陳振聰，亦不贊成他「燒銀紙」，但梁稱，「當你信佢時，No doubt（絕不懷疑）㗎！就算燒銀紙都燒！我知好多名人都有燒一千蚊紙，我仲知王太都有燒！」
不過，同是他和陳振聰好友的前立法局議員張鑑泉於九三年過身，令他一度懷疑陳的「功力」，他認為陳既然與張是老友，沒理由預測不到張的陽壽，「咁重要嘅嘢都測唔到，佢當時都無解釋，我就叫佢要畀心機睇清楚我哋（政商界友人）風水囉。」
梁錦濠昨接受陳振聰的代表律師盤問時，他曾目睹陳使用「風水羅庚」，惟律師指其實陳使用的只是「電子羅庚」，梁回應說「電子羅庚同風水羅庚一樣！」
梁錦濠指，當年陳振聰建議他搬返西貢祖屋居住及做法事，陳要求梁在大廳「挖一個窿，然後放啲玉及古錢」，陳用羅庚再測定方位，後改選屋外之花園掘洞。梁形容過程「佢（陳）燒香、燒啲元寶，然後放啲古錢、玉，然後劏雞，將啲雞血灑落個窿度，然後埋咗個窿」，當時梁的父母、兩名胞妹及司機俱在場。
梁又表示自己負責買雞及劏雞，劏雞時不慎被雞抓傷左手，梁更一度當庭展示疤痕。
不認迷信 不悔識陳振聰
對於當年對陳的指點，梁仍不覺自己迷信，「好難講，因當時犯官非，人一有事發生就想借助儀式、風水幫助順利過渡。」他說不後悔認識陳振聰，「認命囉，不能怨天尤人」「總之我人生座右銘係唔會犯同一個錯誤。」
嘗盡人生高低起跌的梁錦濠，昨日發出人生感言與眾共勉：「好好珍惜目前所有，做人一定要小心，唔可以犯官非、唔好犯法，寧願生活樸實啲，唔會強求，鋒芒過露容易犯錯，令身邊人唔敢出言相勸。」