之但係對於香港呢班衞生官員嚟講，好似冇有怕咁款。衞生署衞生防護中心總監曾浩輝懶係先知先覺咁話世界航機班次非常繁忙，香港出現本土個案係遲早問題，港府會採取圍堵防疫政策，阻延本地個案出現咁話喎。
信佢半成都死啦，靠呢班懶官把關，市民都幾難安心。睇吓封閉維景酒店一役之後，港府搞場防疫騷符碌攞晒彩，喺度沾沾自喜「跨過第一關」，放軟晒手腳，點知本港又出現第二宗豬流感確診個案，病毒如入無人之境，所謂三道防線，講就天下無敵，原來係咁鬼兒戲。
冇錯，美國對出境檢疫闊佬懶理固然係靠害，但食物及衞生局局長周一嶽都唔可以賴晒人㗎，人哋有乜義務要幫香港把關吖。唔好再將防疫失守責任推咗去美國，唔該周一嶽做番好本分先啦！
話時話，其實唔使班衞生官員講都知，香港遲早出現本土個案啦，連日本咁乾淨衞生嘅地方都出事，可見豬流感唔講得笑，有人傳人危機，潛伏期又唔知有幾耐，香港到處污糟邋遢，衞生黑點多多，係病毒惡菌最佳溫床。
最弊係成班懶官踢一腳郁一郁，係都要等豬流感殺到埋身，民政事務總署至話唔排除好似○三年沙士疫潮爆發嗰時咁，喺衞生黑點安裝閉路電視捉垃圾蟲。
真係唔講猶自可，一講把幾火！記得當年安裝閉路電視都有啲成效，但當沙士疫情走咗之後，民政事務總署居然話「後巷衞生情況理想」，將閉路電視都拆埋。
本報記者睇番曾經安裝過閉路電視嘅衞生黑點，周地垃圾，隨時仲污糟邋遢過沙士之前。最離譜嘅係，食環署呢頭鎖定全港八十六個衞生黑點做重點清潔目標，嗰頭又話有部分黑點係私人地方，執法有困難。喂，懶就懶啦，唔好再諸多藉口，其實好多公共地方嘅衞生都未搞得掂，唔好有口話人冇口話自己啦。
呢嗱，講番近排遭封閉七日嘅灣仔維景酒店周圍，喺隔離期間成日都有人清潔消毒，但係重開之後又再打回原形。鬼咩，食環署將清潔外判晒出去就關人個關，承辦商仲唔將貨就價，慳得就慳咩。試過有公廁嘅外判清潔工人因為清潔物資配額制，將清潔劑有咁稀溝到咁稀，用完冇補給，就索性用清水代替，惡菌病毒真係要講聲多謝呀！
特區高官成日搞衞生騷，一日乾淨，百日污糟有乜用吖，防疫把關要持之以恒，清潔衞生點可以三分鐘熱度㗎。唔好話功夫茶靠嚇，一個墨西哥帶菌者已令香港衞生當局踢晒腳，如果再係咁懶懶閒，一個唔好彩搞到豬流感內外夾擊，香港遲早一鑊熟。