老竇養仔，仔養仔，為人子女求學時期慣性做伸手牌問父母攞錢使，商務及經濟發展局副局長蘇錦樑（Greg）亦唔例外。佢話三十幾年前遠赴加拿大讀書時，每星期打一次長途電話返香港，好多時都係主要問屋企人攞錢，依家輪到佢啲仔女去外國讀書，點知同自己以前一樣都係做伸手牌喎！
阿Greg尋日為世界電訊及資訊社會日主禮，佢話資訊發達確實拉近人與人之間距離，好似自己同外國讀書嘅一對仔女，經常以電郵或Chat Rooms（聊天室）聯繫，仔女第一句話會係：「Hi！Dad！」第二句就入主題：「Need Money！（等錢使）」第三句會寫上銀行戶口號碼，即係叫你匯錢過去咁解。
阿Greg又話，現時資訊科技同佢年輕時有好大分別，以前佢喺加拿大讀商科時，用嘅係舊式電腦、無滑鼠，要靠Punch Card做輸入，由記憶體做計算，好似玩戰爭遊戲真係慢到得人驚，用潛艇發射魚雷攻擊敵方戰艦，輸入指令後，要幾小時才知道是否打中敵方的戰艦，現在科技就先進得多。
為提升工作效率，阿Greg最近就買咗部Netbook和iPhone，處理文書工作都快咗，但佢呼籲在場青少年，一定要在資訊科技發達和網上不良資訊之間取得平衡，小心墮入網上詐騙陷阱。