知名香港工業家楊敏德向來比較低調，即使最近做咗行政會議成員，市民對佢嘅認識亦唔係好深，原來佢擅長搞工業同創新科技之外，私底下仲好鍾意畫畫同藝術建築，不但係本港知名建築師嚴迅奇嘅舊同學，佢跟過嘅兩名畫畫師傅仲大有來頭。唔知佢幾時會搞番個個人畫展，畀市民見識吓佢嘅畫功呢？
香港兆基創意書院尋日同嚴迅奇搞咗個建築作品展，楊敏德都有嚟捧場。楊敏德自爆佢哋四十年前就認識，兩人當時已經好鍾意畫畫，不過就點都唔肯講佢哋係中學、小學、定係幼稚園同學，再次證明女人都係對自己嘅年齡相當敏感。楊敏德仲透露細個時跟過中國第一代女性現代畫家顧青堯學畫畫，近年就跟香港知名抽象派畫家陳餘生，不過佢好謙咁話，自己嘅作品只稱得上係塗鴉。
不過講到建築，楊敏德仲自爆話，佢讀大學時都諗過揀建築系，認為建築物本身就係最大嘅藝術品，集文科、理科同藝術於一身，但最後因為唔鍾意成日困喺間房度砌模型而放棄，改為讀只須動腦而唔使動手嘅純數學，依家諗番都有啲後悔。佢覺得香港嘅中小學生，除咗要必修中英數之外，仲應該讀吓藝術同建築，有機會佢會向政府反映喎。