本文重點
香港先後發現兩人確診豬流感（Ｈ１Ｎ１甲型流感），雖然兩宗都係輸入個案，暫時未有喺本地嘅社區爆發，但已經對本港旅遊業造成極大打擊，連內地旅客都少咗嚟香港。香港旅發局主席田北俊同佢嘅自由黨黨友張宇人，近日就喺電台同立法會裏應外合，迫使政府豁免旅行社牌費一年，仲要求政府向業界提供免息百分百擔保貸款，一方面打救處於備受影響嘅香港旅遊業，另一方面亦幫正值低潮嘅自由黨省靚個招牌。
大前日喺立法會舉行嘅特首答問大會上，除咗煲呔曾又再失言狗噏，搞到要公開道歉之外，其實仲有好多新聞值得注意。其中本身代表飲食界、十次發言有九次半關乎飲食業嘅肥仔張，就好罕有咁問咗條有關旅遊業嘅問題，要求政府豁免全港旅行社牌費一年，以及效法沙士時嘅做法，為業界提供由政府作出百分百擔保嘅低息甚至免息貸款，協助佢哋度過金融海嘯同豬流感嘅雙重打擊，避免業界出現大規模的倒閉同減薪裁員潮，令本身代表旅遊界嘅議員謝偉俊（阿Paul）打咗個突。
要一雪前恥砌低謝偉俊
肥仔張嘅前黨魁田少，尋日又以旅發局主席名義，喺電台上提出同樣要求，似乎同肥仔張好有默契。至於究竟係肥仔張義助田少同旅發局，喺答問大會提問救旅遊業，定係田少借旅發局頂帽推銷自由黨嘅建議，就真係好難分得清清楚楚。
其實早前自由黨推出首批民間消費券打救本地零售業，田少亦有以旅發局名義同深圳當局合作，帶同批發零售界議員方剛、旅遊業議會主席何柏霆同總幹事董耀中等三名黨友，喺皇崗口岸向準備過關嘅內地旅客大派消費券。
當然，香港零售業派發消費券，對旅遊業亦或多或少會有幫助，田少咁做都好合理，但該次活動飛起咗喺立法會旅遊界功能組別選舉中擊敗董耀中嘅阿Paul，就令人覺得有啲政治含意，加上田少同肥仔張今次嘅裏應外合，睇嚟自由黨對旅遊界個位仍然係咬得好緊，誓要喺三年後一雪前恥砌低阿Paul！