本文重點
立法會珠三角經濟發展及環境事務考察團二十一人，前晚在深圳東部華僑城茵特拉根酒店享受咗豪華一夜，雖然個個歎完讚不絕口，但原來都有瑕疵。一向身處香港大都市嘅尊貴議員，習慣享受高科技生活，當去到茵特拉根五星級酒店，好自然預期房間有先進設備，但有幾位議員竟然被豪華房間盞床頭燈玩死咗，卓妮聽佢哋呻完都覺得幾搞嘢。
原來茵特拉根酒店房間嘅床頭燈安裝在牆上，「大舊」陳偉業和李華明同卓妮講，前晚臨瞓前諗住熄床頭燈，但搵極都搵唔到個開關掣，諗住打落去搵服務員幫手啦，但又怕瘀驚畀人笑大鄉里，無計可施下，惟有運用最原始嘅方法，就係搵塊布伸手入燈罩內扭鬆個燈膽截斷電源，先至有覺好瞓。
螺絲狀開關想玩復古？
原來身兼行政會議成員嘅劉江華都遇到同樣問題，但劉江華就厚住臉皮打落大堂叫服務員幫手，搞完才真相大白。原來盞燈下面有個螺絲狀嘅開關掣，擰左擰右就可開關盞燈。不過，幾位議員到尋日早上仍然一知半解，當咗粒開關掣係螺絲，話只要擰鬆粒螺絲就熄到盞燈喎！
雖然酒店設計豪華，但議員入住嘅二千元一晚房間，估唔到床頭燈仲要用螺絲調校，莫非想玩復古？
太陽能汽車批評唔畀面
訪粵議員尋日一早啟程到生產太陽能汽車嘅廠房參觀。多位議員早幾日試坐過環境局局長邱騰華揸去立法會部電力環保車後，已經左彈右彈，尋日又彈人哋部太陽能汽車車廂又窄又逼，自由黨主席劉健儀就呻坐得辛苦啲，「大象哥」黃定光更笑笑口話，後座座位好細，認真唔畀面！其實人哋係環保汽車，自然係細架啲，議員應該體諒吓。
訪粵團參觀完深圳後，尋日下午轉往廣州，入住五百多元一晚嘅東方賓館，傍晚暢遊珠江及晚宴。咁啱尋日下午旺角發生高空擲下腐蝕性液體，傷及三十名途人，身為立法會保安事務委員會主席嘅劉江華即時話要求警方加快緝兇，反應都算快，否則掛住夜遊珠江就弊傢伙嘞！
卓妮