平機會前一排受到審計署炮轟，揭發鄧爾邦任內種種不當行為，包括未經政府批准自把自為購買人壽保險，投保額相等於三年薪金，即係七百萬，涉及保費三萬七千幾。根據審計報告，鄧爾邦去北京出差住嘅係每晚租金二千八百八十元嘅「大使套房」，非常之咁大花筒。另外，一連串浪費公帑買呢樣、買嗰樣嘅購物狂行為多不勝數。
既然審計署發表報告，記者梗係走去問一問鄧主席，睇吓佢有乜嘢回應㗎啦。哈，唔得佢死，鄧爾邦居然否認自己係大花筒喎，反而自稱周不時都幫政府慳錢。
好嘞，每逢審計署發表報告，立法會政府帳目委員會必定係會跟進嘅，尋日就開始公審嘞。回答記者就話可以故作鎮定拋浪頭啫，面對一眾議員，你估鄧主席會唔會腳仔軟呢？果然有大將之風，臉皮的確夠厚，鄧爾邦繼續死撐。
議員批評，平機會接獲審計報告之後，鄧爾邦冇同委員商討，私自作出回應，係獨攬大權嘅行為。鄧爾邦就狡辯嘞，佢話喎，審計署以及政制及內地事務局要求將審計報告保密處理，所以佢淨係同幾個平機會管理層討論，冇話畀委員知係出於保密原因。一句講晒，打不死嘅爾邦哥哥又係否認獨攬大權。
所以咪就係話佢勁囉，普通曱甴一拍就扁，之但係鄧爾邦先受審計署一拍，再受傳媒一拍，家陣輪到立法會拍多一拍，連環三拍都頂得住，硬係拍極不扁，真係勁到冇朋友！
不過有一件事比較可惜，鄧爾邦所講睇過報告嘅平機會管理層，包括政策及研究主管朱崇文，以及法律總監潘力恒，兩人喺立法會帳委會同樣明確表示「報告出街前都冇睇過」。即係話，鄧主席即場畀人篤爆，佢原來唔止係大花筒，仲係大話精！
話時話，點解平機會一直都有咁多醜聞嘅呢？睇番歷史，可能香港人權監察最有先見之明。二○○四年，政府宣布委任當時嘅個人資料私隱專員鄧爾邦成為平機會主席，之不過咁，私隱專員嘅任期其實係要到○六年先至屆滿。當時嘅人權監察就質疑嘞，任期屆滿兩年之前就轉職，係咪為咗加薪呀？如果係為咗加薪而跳槽，即係見錢開眼啦，公營機構嘅公信力何存呀？
嘩！你都咪話人權監察唔係洞燭先機，鄧爾邦趷起條尾啫，即刻畀佢哋睇通睇透。平機會長揭長有嘅醜聞之中，佔咗大部分係同個錢字有關嘅。至於平機會嘅公信力咯喎，晨早自廢武功啦！
計功夫茶話齋，抵抗力勁過曱甴嘅鄧爾邦其實有資格做抗疫代言人，一於大力宣傳：瘟疫冇有怕，港人拍不扁！