祈福黨告訴大家：橋唔怕舊，最緊要受。事實告訴大家：只要肯嘗試，粉絲變魚翅！
日前政府千呼萬籲，叫曾經接載過確診豬流感墨西哥遊客嘅的士司機盡快與局方聯絡，誰知有個無聊市民打電話去認頭，而政府竟信到十足！本報「政情‧大舞台」幽了政府一默：問都唔問清楚就信到十足，做事低能到呢個程度一樣係唔抵幫。
老朽「嘰」一聲笑出嚟，假牙幾乎飛脫，差點擊中同枱食飯嘅黃面婆，心想：要是黃面婆都咁低Ｂ，我講嘢佢點頭，就唔使搞到家嘈屋閉，兩公婆話離婚都嗌到喉嚨結繭啦！佢從來唔信我醉酒攬女係酒精累事，性感嬌娃當正係佢，只一口咬定我有錢就身痕。唉！就這樣，我的後半生——依然與我的唯一至愛同床異夢！
寓言好睇，因為佢反映到現實人生。狐狸能一再呃到烏鴉口中塊肉，就係因為烏鴉「死蠢」。以下是狐狸再次「得米」的改寫版：
一天，餓到慌的狐狸又撞到烏鴉叼着一塊肉歇息在樹杈上。狐狸裝出吃完四頭吉品鮑魚的樣子，一搖三擺剔着牙的走近，烏鴉一見仇家展翅欲飛，狐狸急叫：「我的好妹子，你千萬千萬千萬別張嘴，上次騙了你一塊肉，我真不該！」狐狸拍一拍肚皮，佯裝飽嗝，話鋒一轉：「我們狐狸家族最近創辦了一家大企業，還推我當董事總經理，名片正在趕印，商機無限，十大品牌一旦確立，鈔票印得比美國總統救市還要快！屆時，大宴三六九，小吃頓頓有！」烏鴉將信將疑，狐狸緊接着說：「小妹子，你超群才幹加身材出眾，要是肯屈就，我即聘你為副總裁，年薪千萬，我說了算！」
烏鴉低頭，小眼睛流出羨慕之光。狐狸見時機成熟，剔着牙漫不經心地搖晃着身軀要離開，回過頭來甩下一句：「你考慮考慮，我的小妹，機會一如青春，錯過就……」「好哇！」烏鴉一張嘴，肉又掉下了！