依家金融海嘯撞着豬流感嘅環境真係似曾相識，○三年仲做緊財政司司長嘅梁錦松經歷過金融風暴遇上沙士，佢認為特區政府有咗當年經驗，今次對策比當年快咗，不過講到影響喎，就梗係佢經歷嗰次大啲啦！
阿松上月底代表明天更好基金去美國訪問，同當地政商界人士講吓內地同香港嘅前景。望番轉頭，阿松話當年金融風暴同沙士對香港嘅影響，比呢次金融海嘯夾豬流感更大，事關九七年金融風暴嘅震央就係香港，而且係一直延續到○三年先完，再者沙士死亡率高，當時根本搵唔到辦法醫治。
所以阿松對久經歷練嘅港人充滿信心，好似呢次港府處理豬流感都成熟咗、對策快咗啦！佢亦為喺政府入面承受緊壓力嘅舊同事寄予同情，笑笑口話唔喺政府入面真係輕鬆好多。
講講吓，無戴口罩嘅阿松忍唔住咳咗幾聲，佢話身在紐約時，當地已經有豬流感個案，不過佢唔怕會傳染畀屋企人，仲解釋佢之所以咳，乃係畀記者問到咳喎，認真識得講笑。