本文重點
煲呔曾政治上大搞親疏有別，估唔到要佢講句對唔住都偏心。灣仔維景酒店被隔離第五天，住客同職員痛失自由，無啖好食，煲呔曾尋日向呢班受害者表達感謝佢哋嘅諒解，只不過，喺英文版本中出現嗰一個字眼，係廣東話同普通話都冇嘅，就係Apologies，即係道歉。
英文耍冧 中文欠奉
煲呔曾尋日朝早開完行政會議之後，拿拿臨出嚟安撫班被困喺維景嘅旅客，不過，內地同胞如果聽到煲呔曾嘅講話足本，分分鐘仲嬲過之前。
煲呔曾尋日嘅兩文三語講稿，其中一段，特別為維景旅客而設，喺英文版本，大家清晰聽到，煲呔曾向呢班貴賓表達謝意同歉意（Thanks and apologies）。維景旅客要被困七日，煲呔曾代表港府致歉，本來無乜好非議，不過佢首先用廣東話，再用普通話發言，並無「致歉」或「道歉」嘅字眼，比英文版本零零舍舍少咗道歉兩個字。唔通煲呔曾覺得只係需要向老外耍冧？而內地同胞同一班唔識英文嘅酒店清潔嬸嬸，就一啲都唔值得獲得佢一句對唔住？呢件事，認真係匪夷所思。