泰國係前全國人大代表陳有慶嘅家鄉，當泰國發生暴亂，佢都仲喺泰國流連忘返，仲話只要留喺安全嘅地方就冇問題。令佢對泰國卻步嘅，唔係暴亂，而係今次嘅豬流感。豬流感肆虐期間，陳有慶夠晒錫身，近日傾生意寧願用視像會議，都唔敢搭飛機。
陳有慶早兩日現身香港會食飯，提起豬流感疫情，佢話唔敢掉以輕心，除咗喺公司做足防疫措施，向員工派發口罩、酒精消毒液外，身為老闆嘅佢更身體力行，叫太太下廚煲多啲清潤湯水潤吓喉，平日亦減少食煎炸熱氣嘢，總之就操Fit身體，唔畀病毒有機可乘。
不過最令佢頭痛，仲係暫時要減少出埠傾生意。陳有慶係泰國望族，喺當地有唔少家族投資及親戚朋友，經常要香港同泰國兩地飛，可惜依家流感肆虐，為免同人逼埋同一架飛機變成「困獸鬥」，惟有借助先進科技，傾視像會議或者長途電話。之不過隔山買牛始終唔係咁方便，佢話，希望疫情盡快過去，港人可以重拾旅遊樂趣喎。