旅發局主席田北俊錫外孫晉仔錫到燶，但原來佢唔主張過分保護細路，崇尚天生天養。晉仔入讀幼稚園冇耐，呢排咁多傳染病，為免孫仔喺學校受到感染，田少愛女決定暫時唔畀晉仔返學。但身為公公嘅田少就唔多同意，認為小朋友太受保護，抵抗力反而冇咁好，不過既然阿女決定咗都冇辦法。
田少話，以前邊有人識得流感？細路仔粗生粗養，返學玩埋一堆，食嘢一人一啖不知幾過癮，結果咪相安無事，個個牛高馬大，依家嘅細路仔生活條件好，去到差啲嘅環境反而更易中招，證明太過呵護可能弄巧反拙。不過佢都明白愛女苦心，因為幼稚園小朋友始終太細，同佢講衞生常識，轉個頭就乜都唔記得，而且流感疫苗都預防唔晒所有病毒，都係留喺屋企最安全。
講到健康，田少都以身作則，旅發局昨日預備自助下午茶小食招待傳媒，田少見到脆卜卜嘅炸蟹鉗都流晒口水，但最後都力抗誘惑耍手擰頭，佢話已經唔食自助餐好耐，因為如果樣樣都食少少就好易失控，唔知自己食咗幾多，想食得健康，最好就係一人一份，食少少就夠喇。