豬流感肆虐，維景酒店成為城中奇景，最慘係嗰二百幾個住客同職員，被迫困喺一個封閉空間，外國旅客無得落蘭桂坊蒲，個人遊內地同胞無得掃LV、GUCCI手袋，真係唔屈死都悶死。呢個時候，有適當娛樂好重要，卓妮向班名人請教解悶良方，大家不妨參考吓，事關豬流感一日未過，邊個夠膽講一定唔使入麥理浩夫人度假村住番七日。
卓妮諗，如果染上豬流感嘅墨西哥人入住維景酒店嗰日，「金勞詹」詹培忠咁啱路過探朋友，一齊被隔離，咁班維景旅客同員工就唔憂悶嘞，金勞詹只要開番檔大細或者百家樂，由佢做「金牌莊家」，嘩，包保班維景住客被隔離多七日都毫無怨言呀。不過，現實係金勞詹尋日仲喺中環來去自如，而佢公開教大家嘅解悶妙方，亦只係睇電視、睇書呢類一般方法，咁又係嘅，唔通公然鼓吹聚賭咩！
李福善自我隔離
如果問上訴庭前副庭長李福善（李官），佢都一定會教人睇書消磨時間，不過，指定要睇清史小說。李官憶述，六年前沙士襲港，佢同太太唔敢出街四圍去，於是兩個人喺屋企自我隔離咗十日，老婆不停喺屋企抹嘢清潔，而佢就逍遙自在煲小說，李官話，最鍾意睇關於康熙、雍正同乾隆嘅小說，屋企有十幾本，與世隔絕盡情煲書，不亦快哉！
梁孔德合十問好
豬流感陰霾未除，本地足球嘅入座率壓力更大，香港足球總會主席梁孔德話，疫情未爆發，只要大家小心啲就無事，例如平日減少握手，改為合十問好，又祥和，又夠禮貌。球圈好多人都知，梁孔德信佛，諗唔到佢將佛理融入抗疫，佢話，如果佢係維景住客，會以睇書、睇電視同上網同人傾偈解悶喎，卓妮諗，乜唔係同隔離房講佛偈咩？
恒生銀行一姐梁高美懿前日喺一個頒獎禮上現身，卓妮問佢點樣防範豬流感，梁太果然係工作狂，一開聲就話：「公司已經有指引畀同事㗎嘞。」梁太凡事工作至上，又一例證。
卓妮