本文重點
立法會環境事務委員會同經濟發展事務委員會將於下周五組團訪問珠三角，玩足四日先至返香港。本來議員偶爾用番十零廿萬公帑，抽空到內地考察番幾日，其實都唔算好過份，但部分議員對外訪安排要求多多，又事先張揚要遲到早退，又對行程景點諸多批評，就令人質疑佢哋到底係想去外遊定係外訪。最離譜係佢哋為咗遷就今次外訪，竟然決定押後聽取金融管理局嘅季度匯報，懶理金融海嘯嘅最新情況同豬流感對金融市場嘅影響，唔怪得立法會民望會不斷插水喇！
遲到早退要求多
兩個委員會尋日晨早八點半召開聯席會議商討外訪細節，三十六名委員得二十個起得切身出席，本身已經抵鬧。部分團友又事先張揚要遲到早退，淨係參與某一兩日嘅訪問行程，要求秘書處代為安排。最慘係有多名團友本身並冇回鄉證，估計只會獲發一次過簽證入境，必須全程跟住大隊唔畀遲到早退，令佢哋覺得相當唔公平，搞到秘書處頭都大埋。
多名團友又嫌內地建議嘅景點唔夠吸引，例如淨係關心經濟議題嘅經委會委員，就質疑行程嘅環保景點過多，相反淨係關心環保議題嘅環委會委員，就要求睇埋遠離主要行程路線嘅供港食水源頭設施，甚至建議中途拆開兩團各有各睇，認真識玩！
立法會財經事務委員會晨早已定咗喺十八日星期一上午開會，聽取金管局總裁任志剛匯報本港金融市場喺最新一個季度嘅表現，重點當然係海嘯最新情況，以及近日開始肆虐全球嘅豬流感對金融市場嘅影響，之後仲會傾埋任總同一眾金管局高層獲逆市勁發花紅嘅醜聞。但由於外訪團喺同日下午先至趕返香港，多名團友又身兼財經委員會委員，委員會最終決定將會議押後三日，到星期四先再同任總開會。
如果呢三日金融市場有乜驚天動地嘅變化，任總肯定又會喺會上寸爆班議員，話佢自己晨早就先知先覺，想透過星期一嘅會議警告全港市民同小投資者，只不過係你哋班尊貴嘅議員掛住外訪，冇畀到機會佢表演！唔知到時班議員會唔會引用特權法成立番個專責調查委員會，傳召番自己作供解釋今次事件呢？