本文重點
平等機會委員會爛透，主席鄧爾邦亂使公帑，隻手遮天，種種腐敗亂象自被審計署揭發之後，平機會內部隨即七國咁亂。有被斬殺、焗住卸任嘅委員密謀垂死反擊，扳倒鄧爾邦，前日首次行動失敗，依家部署喺月中進行狙擊第二波，喺特別會議上要求鄧主動辭職。鄧爾邦避得初一，避唔過十五，獨立王國滅亡睇嚟係遲早嘅事。
鄧爾邦執掌平機會四年，劣行罄竹難書，不必贅述，反而平機會自從被審計署踢爆七宗罪之後，出現嘅內部鬥爭白熱化，更值一書。港府上月中宣布為平機會換血，十六名成員中，九人被換，任期喺今月十九日結束，當中其實唔少都係鄧爾邦嘅眼中釘。好似前會計界立法會議員譚香文咁，據聞鄧爾邦咁多年嚟不時揀喺星期三、五下晝先至開會，懷疑就係迫使要開立法會嘅譚香文缺席，變相削譚香文權。主席同委員唔好好合作，反而互相謀算，平機會內部管治有幾爛透，可見一斑。
九名被「斬殺」嘅平機會委員近日向鄧爾邦嚟個全面大反擊，由前醫學界立法會議員勞永樂提出喺前日召開特別會議，譚香文等三人支持，諗住即場要求鄧爾邦就審計報告主動請辭，如果鄧唔肯，佢哋就召開記者會，將鄧厚顏拒絕辭職嘅事訴諸傳媒，一場平機會兵變一觸即發。
可惜，唔知係咪鄧爾邦收到風，一早向其他委員落晒藥，報名出席嘅委員人數，竟然不足規定人數，所以特別會議要取消，令鄧爾邦避過彈劾。
要鄧嘔番超豪保費
不過，鄧爾邦避得初一，唔避得過十五，譚香文尋日話，「倒鄧」行動唔會放棄，佢哋已經要求平機會喺今個月中，即係佢哋卸任之前再召開另一次特別會議，呼籲委員踴躍出席。講起鄧爾邦，譚香文即刻扯火，直斥鄧爾邦初時對委員隱瞞審計報告，繼而披露報告內容不盡不實，存心架空委員。譚香文預告，會喺特別大會上，要求鄧爾邦先嘔番吞咗嘅超豪人壽保費畀納稅人，然後主動辭去平機會主席，以息民憤。
如果平機會委員真係成功扳倒鄧爾邦，都算為民除害，功德無量，簡直就係佢哋為平機會所作出嘅最偉大貢獻。鄧爾邦外受輿論炮轟，內受委員施壓，睇怕佢嘅任期都好難捱得到下年一月，諗番轉頭，佢真係唔應該買壽險，應該留番啲錢買「落台保險」，肯定發達，不過睇怕都好難搵到間保險公司肯受佢保囉！