本文重點
自「小巨人」姚明於○二年登陸NBA後，從未嘗過季後賽晉級滋味，但火箭尋日喺第六回合大勝拓荒者92比76，終以總成績四比二進身次圈，姚明征戰七季終圓晉級之夢！不過火箭出線後，將會遇上西岸一哥湖人，基於火箭缺乏次圈經驗，「明哥」要再過一關甚有難度。
魔術「變走」76人
相信大家都會覺得驚訝，火箭對上一次進身季後賽次圈，已經要數到九七年奧拉祖雲及巴克利時代，火箭迷苦等十二年，終解除魔咒。拓荒者主將萊爾今場繼續受到流感困擾，首節尾段更要工作人員陪同到更衣室治理。為免重蹈覆轍放虎歸山，火箭第三節繼續向拓荒者施壓，今場手風最順係「壞孩子」阿堤斯，個人攻入27分，姚明則奪得17分及10個籃板，而佢亦成為2010年上海世博大使。
火箭晉級後，將會挑戰西岸一哥湖人，今季火箭喺常規賽四對湖人全敗，再者如姚明、史高拉及柏堤亞等生涯都未試過有季後賽次圈經驗，火箭想過關將荊棘滿途。另一方面，魔術亦以114比89擊敗76人，總成績四比二晉級。