咪住先，呢鋪好似唔係巴士公司無良喎，而係特區政府大整蠱。之前統計處好把炮咁話，根據可加可減機制呢，巴士係有減價空間嘅，點不知，統計處轉個頭又一嘢扑冧自己嘅結論，原來成盤數計到錯晒。由於計錯數，所以巴士減價嘅合理期望變得好夢成空。
嘩，簡直係天方夜譚！統計處顧名思義主要職責就係計數，員工即使唔係才華橫溢嘅數學家，起碼都要識數手指吖，數埋腳趾都仲得，家陣竟然低低能能計錯數，唔通統計處員工個個都係七手八腳嘅怪胎？如果係咁，返去你哋星球啦，唔好玩謝地球人！
條數真係錯得好離譜㗎，統計處最初話，按照可加可減方程式運算得出結果係負百分之三點零三，反映巴士票價每程平均大約有一毫五仙嘅下調空間，更正嘅結果係負百分之一點二六，未達致啟動檢討巴士票價機制嘅負百分之二水平。處長馮興宏話喎，係人手運算出問題，以後會改用電腦。唉，功夫茶真係唔明，科技咁先進，電腦咁普及，因乜解究仲要用人手運算呢？唔通外星怪胎真係唔識用地球電腦？唔通統計處應該改名「懵閉處」？
話時話，懵懵閉閉計錯數其實係香港官場嘅普遍現象，馮興宏孭住「統計」呢個特製招牌，所以特別肉酸啫，其他官員其實都係錯漏百出。呢嗱嗱嗱，由曾蔭權做財政司司長開始，預算案有邊一年唔係計錯數㗎？次次預算話會出現赤字，到頭來餐餐都係淡淡定、有錢剩。計得最錯嗰個叫做曾俊華，○八年度原本估計財赤七十五億，點知去到十二月底，庫房盈餘經已高達三百億！
可惜吖，烏龍財爺雖然由於計錯數而得到一筆「意外之財」，佢嘅孤寒性格戒極都戒唔甩，死都唔肯開倉派米。你睇吓人哋澳門吖，又派錢喇，今次仲要加碼添，有身份證就有六千蚊。
死火嘞，諗諗吓好得人驚。一個現代化嘅先進社會，所有運作其實係靠一大堆數字，即使係小市民，維持一個家庭都係靠銀行戶口上面嘅數字㗎咋。財政司司長又計錯數，統計處又計錯數，點運作呀？管治有乜可能唔亂呀？喂，可加可減機制適用於其他交通運輸機構㗎，下次又計錯數准許地鐵瘋狂加價咪好唔掂！
功夫茶覺得仲有一條數錯得脫離現實，就係公務員嘅薪金水平嘞。麻煩統計處再計一計數，唔理你用電腦又好，數手指都好，懵官嘅人工冇可能咁高嘅！