彭鍵基被議員質疑其存在價值，因梁展文事件，我們總算大開眼界，原來審批高官轉職，易過為菲傭續期，即使係高官，都要show一show名片或叫一聲：阿蟲介紹嘅！然而，高官轉職，打針都冇咁快！
聆訊揭發彭官與梁展文是中學同窗，身為專業法官竟不知避席，不知「瓜田李下」的道理，仲話自己與梁展文關係非常疏離，讀書時即使每日共處一室，都可以「成個禮拜都冇嘢講」。彭官忽然好似食咗燉豬腦，陳年舊事都可細說從頭，記憶力返晒嚟。不過，老朽諗緊佢讀乜嘢中學，否則怎可能成個星期連問候一句、打個招呼都冇？佢又話畢業後亦在舊同學聚會中見過幾次面，因此認為毋須避席。
嘩！這是甚麼邏輯推理？難怪佢「一案三判」都冇問題！車震案女生被質疑何以突推翻口供，都識表白：講大話都要有個譜！今彭官與梁展文數載同窗而「相見爭如不見」，咁就唔使避嫌？老朽與老妻同床異夢數十載，堅奉「寢不語」，是否可以當「唔係同佢好熟」，就連分居協議書都慳番即可獲判離婚？唉！講大話都要有個譜啊！
梁展文事件前，彭官一共處理三百九十一宗高官轉職申請，但竟然只有一宗曾開會討論，其餘全部以傳閱文件方式審批。議員話佢似橡皮圖章，佢就死撐「合乎情理」、「決定正確」，反指對於「公眾觀感」問題，要制訂詳細的準則。老朽忽然諗起個寓言。狼說：「現在是白天。」但是誰也不相信牠的話。大家看到四周分明是夜晚。「狼是對的。」狐狸說，「現在的的確確是白天，為甚麼黑呢？那是由於日蝕的緣故。」
狐狸的話是句可怕的謊言，因為它聽起來很像是真理。要是錯了還要死撐「合乎情理」，現行制度冇問題，那麼，「日蝕」的寓言還會不斷重演下去。黎明未來，皆因我們無法讓黑夜終結！