政情：馮興宏砌詞狡辯賴不幸

統計處計錯「運輸服務業」工資指數，導致巴士票價可加可減調整機制同時出錯，令市民期望巴士減價好夢成空。統計處處長馮興宏尋日返工時，繼續以「唔好意思」來代替公開道歉，死撐之餘又極力狡辯，指工資指數計算唔可以話複雜又唔算簡單，都唔知佢噏乜；跟住又話今次唔算係計漏數，只係計錯數，仲話員工有呢個錯誤好不幸喎。統計處負責計數都計錯數，感到不幸嘅應該係無辜市民至真！