曾幾何時本港發生一個怪現象，啲政客高官一方面話支持母語教育，一方面就係咁送仔女去國際學校甚至放洋留學，搞到大家對香港教育前景灰晒。候任教育學院校董會主席彭耀佳就以行動力撐本港教育界，點做法？好簡單，就係佢兩個仔女都喺本地學校就讀咯！彭耀佳又為一眾教師抱打不平，佢話以前讀書唔成嘅學生可以出嚟工作，但依家世界變，學生最起碼要讀到高中，所以老師壓力好大，淨係搞課堂秩序頭都大埋；反而嗰啲講棟篤笑、畀考試貼士嘅補習天王就大受家長學生歡迎，咁樣唔係咁好。
咁彭耀佳又會唔會鼓勵仔女投身教育事業呢？佢就話，呢樣就要睇子女嘅喜好同能力，做父母嘅只要發掘佢哋嘅潛能同興趣。佢呢套教育理念聽起嚟頭頭是道，都幾值得全港父母借鏡㗎！
彭耀佳雖然今個月廿五日先接替梁國輝，但尋日已經以候任身份粉墨登場，出席立法會教育事務委員會。咁勤力果然有回報，得到多位議員力撐教院正名為大學，仲要政府拿拿聲拎個正名時間表出嚟。彭耀佳自己就拍心口話，提升教院地位一定係佢任內嘅首要目標，佢仲自喻為樂團指揮，話一定會幫手表達教職員同學生嘅意見。