馬會大董葉錫安（Simon）前日以離職公務員就業申請諮詢委員會成員身份，出席立法會調查梁展文專責委員會公開聆訊，見佢啲皮膚黑咗好多，再黑多少少幾乎可以扮演包青天。原來Simon上月同家人去咗加拿大溫哥華度假三星期，主要到附近Whistler滑雪度假，由於白雪反射陽光能力極強，於是乎就曬到皮膚黑晒，變咗做馬會古天樂。
講到滑雪，Simon好有興致，佢話二十幾歲仔嗰陣已經開始滑雪，事關當年帶小朋友到歐洲旅遊，見到其他人滑雪覺得好有趣，於是學埋一份，學學吓就上咗癮嘞，至今每年都會抽時間去加國滑雪，每次都會寄居喺好朋友屋企。滑咗幾十年，咪變成滑雪高手？Simon就好謙話，自己技術都係一般，反而啲小朋友雖然遲學，但就滑得好好多。佢仲建議大家如果有機會，可以感受吓滑雪嘅樂趣。
今次Simon去嘅Whistler，包括Whistler Mountain及Blackcomb Mountain，距離溫哥華約兩小時車程，屬世界知名嘅滑雪場地，亦係北美滑雪雜誌公認設備齊全及雪質極佳嘅滑雪場，設有一般滑雪道及越野滑雪，兩座山同獲國際奧委會選定為舉辦二○一○年冬季奧運場地，怪不得Simon年年都去喇。