政府尋日公布，立法會大樓二○一二年遷去添馬艦後，會將大樓移交司法機關，作為終審法院新址，由於大樓已列為古蹟，外貌會保留，但會因應需要作內部裝修。港英立法局自一九八五年遷入現址後，香港呢廿幾年嚟大大小小社會紛爭都喺度解決，所以港人對大樓都有一份深厚感情。不過，要數最唔捨得立法會大樓嘅，應該係喺大樓內工作已經接近廿年嘅立法會秘書長吳文華（Pauline）。
唔少老一輩嘅香港人都知道，立法會大樓前身本來就係最高法院嘅大本營，難怪古物古蹟辦事處執行秘書明基全尋日話，立法會大樓回復司法用途最適合不過。講開大樓歷史，就唔可以唔提立法會嘅鬼古，話說日戰時期大樓曾經被日軍佔領做憲兵總部，當時外界盛傳日軍將大樓嘅地牢改建為拷問房，仲有戰俘喺度被處決，所以大樓改建為立法會大樓後，就有唔少鬼古傳出，有議員話見到鬼影飄過，又有職員話大樓一到夜晚，地牢就會傳出鐵鏈拖行嘅聲音，總之講到繪影繪聲。
Pauline尋日就幫大家揭開立法會鬼古之謎。佢話啱啱入立法會秘書處做嘢時成日開夜車，一到夜晚真係聽到啲怪聲，嗰時Pauline個心都寒一寒，但後來聽得多，發現怪聲只不過來自地牢機房，原來關掉冷氣後，一冷一熱令機械膨脹而發出聲響。佢仲話咁多年都只聞怪聲，不見怪影，所以相信立法會大樓嘅鬼古只係以訛傳訛。
除咗Pauline之外，做咗成廿年立法會議員嘅張文光一樣唔係咁捨得大樓搬遷。佢話次次開會當官員講親廢話、耍太極嘅時候，佢都會「望天」，即係欣賞大樓嘅圓頂。張文光笑言：「見到咁靚嘅穹蒼，就會乜煩惱都冇晒！」