東亞運動會籌款一波三折，早排搞到港協暨奧委會會長霍震霆都嗆住度氣大聲疾呼，民政事務局去年底被迫拍心口話有信心搵到贊助商，以為當局有乜符拂啦，原來係搵咗馬會出手。馬會主席陳祖澤（John）尋日代表馬會捐出四千萬元，資助年底舉行嘅東亞運動會，用作推行義工計劃、興建BMX小輪車公園及津貼學生購買東亞運門票。
東亞運預算經費兩億四千萬元，正因為馬會慷慨解囊為東亞運填氹，收入已超標達到二億六千萬元，政府當局真係還神都嚟唔切，但有高官尋日仲鬆毛鬆翼，話依家超標完成，談不上資金充裕喎！雖然阿John話馬會對體育界支持不遺餘力，但當初政府決定籌辦東亞運就預咗要承擔，依家揼馬會心口只會攤薄其他受助者嘅資源。
政府統計處因為計錯「運輸服務業」工資指數，導致巴士票價可加可減調整機制同時出錯。曾任九巴高級執行董事嘅阿John出名數口精，雖然佢唔評論事件，但就笑稱：「我一向只係用百零蚊嘅計算機計數，有時都會用電腦幫吓手嘅！」