本文重點
復活節下星期就到，又係一班政界大忙人抖氣叉電嘅黃金假期，有人選擇旅行散心，有人揀喺屋企大覺瞓，全國人大常委范徐麗泰比較另類，將會喺廣西嘅窮鄉僻壤「度假」，扶貧考察，范太話，偏遠山區未必有涼沖唔方便，已經做好心理準備，隨時要過一個充滿「女人味」嘅復活節。
范太今次係以香港回歸基金信託人身份，返廣西考察基金嘅扶貧項目成績，睇吓啲貧民嘅生活實況，第一站係河池市東蘭縣，第二站去宜州市，姑仔范尚霞做伴，負責執行扶貧項目嘅中國婦聯會派人做佢哋嘅盲公竹。
做善事唔怕無涼沖
廣西係中國最貧瘠地區之一，范太尋日同卓妮憶述，以前去偏遠地區考察，有辣有唔辣，好處係景色通常好靚，唔習慣嘅係，可能生活設施比較差，佢試過三日無涼沖，考察期間都察覺自己多咗「女人味」，不過做有意義嘅事件，乜都無計啦。
作為今次廣西行東道主嘅中國婦聯，早前已經通知定范太，叫佢哋記住着波鞋起行，唔使問，廣西有大把崎嶇山路等緊范太。范太話，自己本來有兩對波鞋，但係一對頂趾，一對個腳踭位磨蝕咗，於是佢決定要買對新波鞋上路。
卓妮