「圓」美與「獸」麗咁坐先叫型！

金屬圈後有乾坤？

一張椅點先叫完美？每個人嘅定義都唔一樣，但講到「圓」美，由米蘭設計師Emanuele Magini打造嘅「Anish」，絕對係當之無愧！設計靈感來自英國藝術家Anish Kapoor嘅作品，從正面睇，有啲令人摸不着頭腦，一個金屬圓框被一幅藍布覆蓋住，咁都叫做椅？但只要坐下去，你就會知道內有乾坤！原來呢幅藍布非常有彈性，其後方隱藏着一張聚酯座椅，當有人挨坐在藍布上，它就會因應其坐姿而變形，產生一種緊密互動嘅關係。

網址：www.emanuelemagini.it

變形飛魚任你坐？

由家具設計品牌Designarium創意總監Stéphane Leathead設計嘅「Exocet Chair」，係另一張展現出圓美線條嘅座椅。「Exocet」係法文，解作飛魚，亦係呢張椅嘅設計原形。椅子採用天然嘅原木材料打造，流線形設計，外形奇特，中心嘅圓環看似魚眼，後面嘅魚尾可以翻動成好幾種形態，令座椅可一下子變成躺椅或搖搖椅，用另一種形式表現飛魚嘅靈活性。

網址：www.designarium.ca

充滿曲線美嘅椅子，可隨時變成躺椅或搖搖椅。	放大圖片	從呢個角度睇，真係好似一條飛魚！

八爪魚為你撐腰？

講到外形奇特嘅椅子，又點可以數漏經典作「Octopus Chair」呢？單睇椅背，外形勁似八爪魚，拖着長長嘅觸手，細緻度足以媲美一件藝術雕塑！造物者係嚟自西班牙嘅Máximo Riera，呢位設計師自推出「Octopus Chair」之後，陸續將犀牛、海象、獅子等猛獸融入其椅子設計，除了要表現動物嘅野性美，亦希望提醒人類要維持生態平衡，對瀕危動物多加關注，真係型得有意義！

網址：www.maximoriera.com

「Octopus Chair」嘅形態與肌膚紋理都模仿得十分細膩。

Máximo Riera以不改變動物形態為大前提，力求令椅子保持穩定性。

同場加映：躺椅暗藏隧道？

椅子設計嘅花樣多多，除咗以外形獨特嚟吸引眼球，有設計師更利用椅子為用家提供一個偷閒空間呢！就正如躺椅「Tunnels」，出自以色列年輕設計師Noga Berman之手，主體由金屬椅架同一條條橡筋組成，再配合魔術貼，用家可以穿過橡筋帶之間嘅縫隙，匿藏「隧道」內休息，相當搞鬼！

網址：www.nogaberman.com

撰文：司徒德琳

圖片：互聯網