去啤酒館 泡啤酒浴

歷史老店！飲酒又浸酒

捷克喺全球人均啤酒消費量排名中名列前茅，想感受當地啤酒文化，布拉格老城區一間建於15世紀嘅啤酒館U Medvídku絕對係朝聖地。內裏除咗有可容納500人嘅啤酒花園，亦同時設有小型啤酒釀製廠，雖然產量有限（每年僅約40噸），但當中酒精含量達11.8%嘅X-Beer33及黑啤OLDGOTT可謂享負盛名。而啤酒館內亦同時設有提供45間客房嘅酒店，其中一間附有浴缸及啤酒水龍頭，讓住客可以邊飲啤酒邊泡啤酒浴，浸完後由內到外都成身啤酒香！此外館內亦提供DIY體驗，在專人教導下，釀製屬於自己嘅啤酒，過程可順道參觀內裏嘅啤酒工場，並有小食提供，完成後會獲得證書，啱晒一眾酒鬼。房價每晚€74（約HK$622）起。

U Medvídku由500多年前嘅啤酒廠改建而成。	房間以木造為主，感覺古色古香。	浴缸水龍頭會流出冷及熱嘅啤酒，泡啤酒浴冇難度。

U Medvídku

網址：umedvidku.cz

醉佳浴缸！享多國風味

冇時間飛去捷克，去台南嘅啤酒花大酒店啦！啤酒浴設施位於酒店地庫，浴缸放入了啤酒花及中草藥包，加入40至42℃熱水後，啤酒花酵素成分會產生泡沫，還有按摩浴缸本身嘅泡泡及加入1公升啤酒，泡量絕對豐富！另外酒店還會準備1公升啤酒讓你邊泡邊喝，飲唔晒亦可以加到浴缸中，浸浸吓分分鐘會有醉意。酒店以多國啤酒元素為主題設計，每個樓層嘅主題也不同，例如6樓以德國為主題，5樓係比利時，在牆上有手工啤酒歷史與製作過程嘅介紹。而每間房嘅裝潢設計也不一樣，與樓層互相呼應。酒店地下設有Sports Bar，可以享用從世界各地精挑細選嘅啤酒。房價每晚NT$2,070（約HK$545）起。

浴缸放入了啤酒花及中草藥包，再加入40至42℃熱水，還會準備1公升啤酒讓你邊泡邊喝。	酒店地下設有Sports Bar。可以享用到從世界各地精挑細選嘅啤酒。	每間客房嘅裝潢設計也不一樣，貫徹以啤酒為主題。

啤酒花大酒店

網址：http://www.beerhotel.com.tw

全球首間！啤酒廠酒店

喜歡手工啤酒嘅朋友，應該聽過Brewdog呢個於2007年創立嘅蘇格蘭知名品牌。該品牌除咗出產手工啤酒，更進軍酒店業務，於2018年喺美國俄亥俄州哥倫布市開設全球首間位於手工啤酒廠內嘅精品酒店Doghouse。酒店共有32間客房（包括8間套房），賣點係多間套房可以俯瞰釀酒廠嘅內部環境，啤酒迷肯定畀Like。其他房內設施包括設有啤酒水龍頭，就連浴室嘅肥皂亦使用啤酒花製成。大堂提供多種娛樂設施，還有大大張吧枱，住客Check In時會送上一杯歡迎啤酒。酒店同時提供大量啤酒相關書籍，還設有6,000平方呎嘅互動啤酒博物館，你也可以報名參觀啤酒廠，深入了解手工啤酒嘅生產過程。房價每晚US$172（約HK$1,342）起。

Doghouse是全球首間位於手工啤酒廠內嘅酒店。

每間客房都設有啤酒水龍頭，可以和朋友喺房間內啤足全日。

Doghouse部分房間可望到廠內生產啤酒嘅過程，啱晒愛酒之人。

連浴室也有放滿啤酒嘅小雪櫃，可以邊沖涼邊飲用。

DogHouse Hotel and Brewery

網址：https://www.brewdog.com/uk/locations/hotels/doghouse

啤酒浴抗哀老

啤酒浴好處多多，由於啤酒中含有維他命B和鋅，據說有效增強免疫力，幫助去除體內多餘水分，以及延緩衰老。另外亦可放鬆肌肉、活絡關節、去除皮下有害物質，藉以改善膚質。仲可以提高心肺功能，加強血液循環，增強免疫力。不過由於啤酒主要由麥、酵母等物質構成，若本身對小麥、麥芽等麩質食品，或是對酒精過敏嘅朋友，就要小心會引發紅腫、刺痛、痕癢等反應。

雖然啤酒浴有唔少好處，但要留意自己體質是否合適。

AMABIE IPA所得嘅利潤會撥捐「防止新型冠狀病毒肺炎疫情擴大活動基金」。

飲人魚海妖啤酒抗疫？

抗疫又關啤酒事？話說日本啤酒生產商Sankt Gallen最近與憑《農大菌物語》而為人熟悉嘅漫畫家石川雅之合作，推出由他所繪製嘅人魚海妖AMABIE插圖啤酒「AMABIE IPA」。AMABIE傳說於江戶時代嘅海上出現，相傳如果世上出現疾病，只要將它嘅畫像畀病人睇就會康復。而Sankt Gallen靈機一觸，推出了畫上AMABIE嘅啤酒，祈求疫情能及早停止，推出後更火速售罄。

網址：https://www.sanktgallenbrewery.com

撰文：明藹寧　

圖片：互聯網