魚仔豉油抗疫有佢份

外賣送！魚仔抗菌液

日本最近進入緊急狀態，好多宴會及活動都被取消，令大量魚仔豉油空樽無法被使用，不過有關方面啱啱推出#SafeHandFish項目，就係用該款空樽盛載抗菌液，免費贈送畀買外賣嘅食客。外觀上「魚仔」由紅蓋改為藍蓋，而魚仔內嘅抗菌液Cleanse EX由西柚種子抽取嘅精華「GSE」混合精製水而成，百分百天然，並有逾3小時持續高抗菌能力。 現時日本共有13間食肆提供，包括位於代代木上原嘅米芝蓮1星法國餐廳sio，及涉谷提供送餐服務嘅Mo:take等，香港唔知有冇食肆跟風呢？

網址：https://cleanseex.com/safehandfish/en/

超搶眼！放大版玻璃燈

雖然魚仔豉油為食客提供方便，但澳洲設計公司Heliograf旗下兩位設計師Jeffrey Simpson及Angus Ware，喺食壽司外賣時發現無法回收利用嘅魚仔豉油樽，於是激發佢哋花咗3年時間開發魚仔豉油外形嘅玻璃燈Light Soy，藉以帶出環保訊息。該燈外層使用磨砂過嘅硼硅酸鹽玻璃，內裏搭配節能嘅LED燈，除了燈本身材料環保，包裝亦使用紙板和甘蔗紙漿，完全沒有用塑膠。Light Soy備有吊燈和座枱燈兩款供選擇，前者售AU$649（約HK$3,245），後者售AU$590（約HK$2,950）。

網址：https://heliograf.com/lightsoy/

真耳環！至In戴上身

魚仔豉油嘅經典設計，亦一直係潮界「致敬」嘅對象，喺日本便不難搵到相關圖案嘅T Shirt及孭袋等產品。不過講到原汁原味，首推由日本著名食品模型公司Design Pocket推出嘅魚仔豉油耳環。Design Pocket嘅食品模型以真假難辨馳名，呢款耳環嘅像真度極高，而且魚樽內更注有欵似豉油嘅啡黑色液體，邊行邊搖晃，十分過癮。該廠更推出魚仔豉油橡筋髮飾，有興趣嘅朋友不妨買齊一套。

網址：https://www.foodishstore.jp/

跟外賣附送嘅魚仔抗菌液，會有膠袋包住，並附有說明書，相當貼心。	魚仔豉油變身玻璃燈Light Soy，分別有吊燈和座枱燈兩款供選擇。	戴上耳環後，小心其他人食壽司時會打你主意，售￥1,730（約HK$125）。

魚仔豉油知多啲

魚仔豉油樽始創人渡邊輝夫於1954年看到報紙報道指「塑膠年代開始來臨」，於是佢從豉油樽方面着手。最初容器採用圓柱形設計，後來考慮到隨壽司附送，於是將之變為鯛魚形狀，成為魚仔豉油。隨着鐵路便當普及，及愈來愈多百貨公司採用，生意開始擴展至全國，成為今日無人不識嘅產品。

藝術展都有份

魚仔豉油就連藝術界都關佢事！話說於去年暑假喺高崎市美術館舉辦嘅「3是一個神奇的數字」展覽中，主辦團體「three」便運用了大量魚仔豉油樽去創作立體作品。其中包括讓訪客將魚仔豉油樽裝入自己喜歡嘅顏色液體，然後隨意插入牆上，共同創作色彩豐富嘅展品，效果悅目！

今時今日魚仔豉油樽已發展出多款唔同Size。

參觀人士將顏色液體裝滿魚仔豉油樽，然後隨意插入牆上，創作出色彩豐富嘅展品。

撰文：明藹寧

圖片：互聯網