情趣酒店玩啲乜？

玩樂園Feel　回味初戀

如果你渴望喺主題樂園內與另一半尋找刺激，位於岡山市、擁有27間客房嘅HOTEL FRANCE就可滿足你。內有多間以遊樂場為主題嘅房間，設計毫不馬虎，喺旋轉木馬房間內，兩隻木馬真係會圍繞大圓床轉，加上七彩繽紛顏色及燦爛燈光，勁有遊樂場Feel，童心返晒嚟！另外仲有跑車及會前後郁動嘅小火車，甚至有星空等主題，為閨房樂趣增添玩味。房間也有一些較普通設計，百貨應百客，視乎你當日想要乜氣氛。各種沐浴或清潔用品也可借用，Cosplay衫則另收500日圓。此外菜單選擇亦很豐富，隨時可以補充體力。

造型可愛嘅火車，可以依照路軌前後移動。	大床模仿跑車外形，為車迷度身而造。	科幻主題房間，有穿越時空嘅感覺。

HOTEL FRANCE

網址：www.vivafrance.jp

玩瀡滑梯　鴛鴦戲水

位於名古屋、共有49間客房嘅Hotel Regent Odaka，外表平平無奇，但走進頂樓最豪華嘅套房後，一定會禁不住驚嘆咁都得？該房內設有一條兩層樓高、直接瀡入暖水小泳池嘅私家滑水梯，讓客人可以隨時玩水，來個鴛鴦戲水培養感情！間隔為兩房一廳，面積超大，房間設按摩浴缸、卡拉OK、荷里活電影頻道，亦有各式各樣護理用品照顧女性客人需要，當然也少不了成人用品及Cosplay服裝出租或購買。除了情侶以外，亦吸引不少三五知己選擇這裏做派對場地。酒店內另有旋轉木馬及監獄等主題客房，梗有一款啱心水。

Hotel Regent Odaka最豪華嘅套房設有樓高兩層嘅滑水梯，並附設暖水小泳池，啱晒喜歡鴛鴦戲水嘅朋友。

旋轉木馬主題房夠晒夢幻，可會讓你拾回童真？

有監倉又有大床，想點玩都得！

套房客廳超大，除了情侶幫襯，酒店亦順勢推出「女子會套餐」，以華麗布置吸引女生在此搞派對。

Hotel Regent Odaka

網址：www.hotelregent-odaka.com

玩電車景　幾可亂真

如果你熱愛角色扮演，位於東京嘅Hotel Sara錦糸町就啱晒你，酒店共有43間客房，其中會搵到電車、診所、課室、影樓等場景，場景設計偏向豪華風格，而且酒店貼心提供免費Cosplay服裝租借，玩起上嚟肯定更投入。加上每間房更設有華麗嘅大床同按摩浴缸，無論想玩定想歎都夠爽。除咗場景外，亦有唔同風格設計嘅房間，例如豹紋、貓、繩縛、高跟鞋、糖果、花魁等，每次揀一個主題都有排玩啦！值得一提，酒店嘅餐飲Menu非常豐富，扒類、意粉、薄餅、漢堡包、甜品及酒類一應俱全，方便你食過Room Service後再大戰連場。

電車主題房將電車座位及扶手重現，情侶可以輕鬆進入妄想世界。	對拍攝有興趣嘅朋友，影樓主題套房肯定係你杯茶，不妨先拍攝寫真熱吓身。	「大夫，我唔舒服呀！」在逼真嘅診所內，可以大玩醫生與病人遊戲。

Hotel SARA 錦糸町

網址：https://sara-kinshicyo.jp

情趣酒店於亞洲較為流行，相信因為好多家庭都係「幾代同堂」一齊住，令唔少情侶或夫婦需要額外嘅空間親熱。	大多數情趣酒店都有Cosplay服租借服務，讓女士們化身性感女神。	要Book情趣酒店，日本有多個訂房網站幫到手。

情趣酒店知多啲

早喺日本江戶時代（1603至1868年），就有一種特別嘅旅店和茶屋，設有秘密入口及離開通道，給特別行業接客或情人約會使用，而呢種茶屋可算係情趣酒店嘅雛形。到咗上世紀70、80年代，日本經濟急速發展，令情趣酒店數量激增，酒店嘅裝潢布置多以奢華為主，盡力滿足客人幻想。

租房留意事項

情趣酒店設有多個租房Plan，最短可租1.5小時，最長可過夜。走進酒店後，前枱唔會有人招呼，你只需直接在屏幕上選擇你想要嘅房間及時間，付錢後拿鑰匙入房即可。房內有成人電影免費任睇，部分房間更設有售賣機，售賣各種成人用品、Cosplay服裝等，退房時才付款。謹記18歲以下禁止進入。

預訂網站幫到手

今時今日，情趣酒店開始普及，全因當中唔少嘅空間、設備、裝潢等都比普通酒店好，性價比高，因此喺大型酒店客房預訂網站都也可搵到情趣酒店嘅蹤影。不過想要豐富選擇，就不及日文訂房網，有時更有優惠券送贈呢。推介當中嘅Stay Lovely，介面簡單易用，可按地址、附近車站或城市來搵房，相當貼心。

網址：https://stay-lovely.jp

撰文：明藹寧

圖片：互聯網