復活節估估吓！3大奇趣教堂

充氣教堂隨處擺

你有冇諗過教堂可以隨處移動、甚至自己擁有一間教堂？西班牙公司Innovations Xtreme，便有可供租借及購買嘅充氣教堂Inflatable Church。教堂本身由小禮堂及尖塔兩部分構成，面積約11米×11米，最高部分12米，可在兩小時內完成充氣，放氣半小時搞掂。教堂內有充氣風琴、祭壇、講壇、椅子等等，最多可容納60人，喺2004年更打入健力士世界紀錄，成為全球最大充氣教堂！主要用途除咗出租畀新人舉行婚禮，還可以用來舉行音樂會等活動，喺偏遠窮困地方更可作真實教堂宣道。價錢方面，教堂每個售€15,000（約HK$127,500）。

Inflatable Church

網址：http://www.inflatablechurch.com

教堂可容納最多60位賓客，就算穿高跟鞋踩場都無有怕。

教堂充氣風琴、祭壇、講壇等一應俱全，就連彩繪玻璃窗也跟到足。

老樹不死變教堂

同樣令人意外嘅有法國北部村莊Allouville-Bellefosse嘅橡樹教堂（Chêne Chapelle）。教堂特別之處係建於當地一棵樹齡達800年、高15米嘅古老橡樹內！據說喺17世紀後期該橡樹被雷電擊中，中心部分更被燒毀，最後卻奇迹地活下來。當地宗教人士把樹幹燒死部分掏空，並分上下層興建兩間教堂（分別係Notre-Dame-de-la-Paix及Chambre de l'Ermite）。不過橡樹本身已經相當衰弱，需要蓋上保護層及動用大量鋼架支撐。而橡樹教堂亦係當地嘅神聖地標，除維持每兩年一次嘅彌撒，亦係每年8月15日聖母升天朝聖遊行嘅集合點，地位超然。

Chêne Chapelle

網址：http://en.normandie-tourisme.fr/normandy-tourism-1-2.html

橡樹教堂位於法國北部村莊，於古老橡樹內設有兩間教堂。

教堂布置偏向簡陋，最注目莫過於聖母像。

中西合璧耶穌變華人

要講外觀最嚇一跳嘅教堂，應該非台灣台南市嘅鹽水天主神聖堂莫屬。該教堂創立於 1955年，建堂時為求「入屋」讓當地華人信奉，建築由內到外都採用中國宮廷式長方型建築，並稱為祭天殿，驟眼睇仲以為係間寺廟！聖堂內同樣意想不到，上方拱頂有摩西十誡、信望愛等主題畫作，但與此同時，畫作邊緣位置卻有二龍爭珠等中國傳統裝飾。而在十字架下嘅聖經人物畫像包括耶穌，竟全變成華人造型，就連大家熟知嘅名畫「最後的晚餐」，桌上食物都變成了中式包子，門徒手執嘅餐具則改為筷子，絕對將大家心中嘅教堂印象顛覆過來。

鹽水天主神聖堂

網址：https://bit.ly/2uPUZDn

鹽水天主神聖堂外觀 有着濃烈中式廟宇色彩。

聖堂內壁畫中西合璧，出發點是向中華文化根深柢固嘅當地人傳教。

撰文：明藹寧

圖片：互聯網