邊個夠佢勁？全球最強波鞋Collector

為波鞋買500萬保險

Kenny Gonzales在個人Instagram（IG＠the_perfect_pair）中自我介紹的第一句就是：「Not For Sale」。能夠只儲唔賣咁大口氣，全因佢唔志在，本身擁有賭場的他，當然唔須要靠賣波鞋賺錢！這位年過40的大叔，早在20多年前已經開始收藏波鞋，近年卻因為老婆註冊了IG，將他與波鞋打交道的生活放上網，令他忽然成為了網絡紅人。由於銀彈十足，所以大家恨到流口水的限量神鞋，他隨時擁有幾對，就連全球只有一對，甚至大家見都未見過的，都是他的囊中物。例如出名難入手的Nike What The系列，他就有一大堆，Nike Dunk SB系列中的天價配色亦幾乎有齊，Air Jordan 4身價加加埋埋更隨時夠畀首期。2016年接受傳媒訪問時，他曾透露為珍藏買了70萬美元保險（約546萬港元），可想而知所有珍藏的總值，絕對是天文數字。

唔好計鞋盒入面擺咩神鞋，淨係可以將堆透明鞋盒疊到上天花板已經恨死窩居香港的波鞋迷。	Nike及Jordan Brand的Oregon系列波鞋不對外發售，只送贈予相關人士，普通人有一對半對收藏已經不得了，但佢有幾十對（至少）！	淨係呢對Carhartt×Eminem×Air Jordan 4於波鞋網站Flight Club都賣緊2萬……美金。

呢堆超罕的Air Jordan 4波鞋，加加埋埋真係夠畀首期。

基本上有畀Kenny Gonzales「點名使用」的波鞋周邊產品都必定成為人氣品牌，繼CREP PROTECT及STANCE之後，就有呢個袋包品牌HEX，經常要帶住心愛波鞋周圍飛的要買番個。

撰文：賴文曦

相片：互聯網