搞鬼4招！Phone騷夜攝

第一招：微距近攝突出主體

唔少餐廳和主題樂園都會趁萬聖節推出特別活動，除咗用正常拍攝角度之外，不妨試吓近距離Close-Up拍攝，以微距展現不一樣的主體。新款手機都加入多鏡頭設計，好似定價千多元的Redmi Note 8 Pro，可以用6,400萬像素鏡頭拍攝廣角風景之餘，同時備有200萬像素微距鏡頭，可於近至2cm距離下拍攝物件，用來影Halloween特色食物或布置大派用場。

以6,400萬像素鏡頭手持拍攝夜景，可見雜訊控制能力不俗，暗位細緻分明。	以微距鏡頭配合專業模式，可輕鬆近距離拍攝特色布置或食物。	Redmi Note 8 Pro搭載6,400萬像素主鏡頭、120度超廣角鏡頭、200萬像素微距鏡頭及200萬像素景深鏡頭。

第二招：手動調控感光度

萬聖節期間多數人會喺晚間出動，於昏暗環境影相，手機會自動將快門時間延長，容易影到鬆郁朦。其實各位可利用手動模式，將感光度（ISO）調高，使快門保持一定速度。當然手機支援高ISO低訊噪就更有幫助，好似Huawei旗艦級Mate 30 Pro可調至最高ISO 409,600，實試於黑房內都可成功拍攝，配合4個Leica認證鏡頭，夜攝冇難度！

上月發布的Mate 30 Pro剛於內地開賣，暫時只有水貨供港。 售價：$6,780起（b）

內置專業模式，可手動將ISO調校至最高409,600。

第三招：活用夜間模式修正

Halloween的布置黑麻麻，自動模式下影人好易出現曝光不足情況。大可啟動手機的夜間模式拍攝，以iPhone 11 Pro為例，其Night Mode會透過相機感應器及處理器互相配合，於低光環境自動開啟，圖示旁邊顯示的號碼代表拍攝所需時間。軟件同時會修正晃動及模糊部分，再自動調整對比度、色彩及消除雜訊，令光暗細節清晰分明。

iPhone 11 Pro及Pro Max用上三鏡設計，支援Night Mode強化夜攝能力。 售價：$8,599起（c）

畫面頂部會顯示Night Mode圖示，旁邊的號碼代表拍攝所需時間。

第四招：DIY光影添氣氛

想提升恐怖氣氛，單靠化妝和道具梗係唔夠。原來手機都可玩光影特效，例如《Screen Flashlight》燈光程式，可將手機屏幕變成不同顏色的燈光板，當紅綠燈光照射到人臉，驚嚇程度即時提升。另可下載多重曝光後製App如《Multiple Photo Blender Double Exposure》，將Halloween的搞鬼、驚嚇相片堆疊成鬼影效果，擺上網肯定呃到Like。

《Screen Flashlight》將手機屏幕變成燈光板，又紅又綠，恐怖氣氛即時提升。

以多重曝光後製App，可將幾幅相片堆疊出鬼影效果。

撰文：林子聰

部分攝影：莫文俊、胡振文

查詢電話：（a）3001 1888、（b）2374 0618、（c）800 908 988