兒童適宜繽紛消暑冰品

落手製作　親子好節目

將心比己，大熱天時你都想食雪糕、喝凍飲消消暑吧！那又何必視它們為洪水猛獸，嚴禁小朋友進食？擔心食得多會咳，何不趁機會教他們小食多滋味的道理。若然覺得生冷嘢無益，自家製作應該會令你安心，而且一定啱口味。馬鞍山保泰街一間兒童餐廳的大廚Bowie就設計了兩款色彩繽紛的健康夏日甜品，雪山雪糕固然吸引，晶瑩剔透的涼粉也爽滑彈牙，兩款消暑冰品做法簡單，當成親子活動一樣溫馨又好玩。

軟綿綿好味道

傳統雪糕主要用蛋黃、全脂奶及忌廉製成，拌勻後先放入冰格冷藏，之後每隔30分鐘就要拿出來用打蛋器攪拌，重複這個步驟6至7次後，至少還要雪大半日先食得，就算小朋友應付得到也沒耐性慢慢等吧！這個改良版藍莓雪山雪糕做法簡單得多，而且雪凍食又得，即刻食一樣無問題，小朋友一定鍾意。

材料：

甜忌廉200克、藍莓醬60克、淡忌廉50克、煉奶1茶匙

貼士：

喜歡豐富口感可選用鮮果醬，想質感更滑溜則以果蓉代替。

做法：

1. 用打蛋器將甜忌廉打至挺身；與藍莓醬拌勻。	2. 放入唧袋，把忌廉唧在雪糕杯上成雪山形。	3. 用打蛋器將淡忌廉打至奶昔狀，與煉奶混合成醬汁。
4. 在雪山上淋醬汁，冷藏兩小時即成。

冰冰凍凍涼透心

涼粉有消暑功效，但賣相黑鼆鼆未必吸引到小朋友，這個改良版就以大菜絲代替涼粉草，口感同樣爽滑，但色澤變成透明就容易接受得多，加上混合了糖水或果汁令味道更易入口，消暑之餘仲可以氹小朋友食多些水果。

材料：

清水300克、雜果150克、沙糖80克、大菜絲5克、糖水適量、薄荷葉少許

貼士：

用黑糖漿或果汁代替糖水更健康有益。

做法：

1. 煲滾水，煮溶大菜絲。	2. 加沙糖拌勻，倒入平底盤雪凍。	3. 切成正方形粒粒。

撰文：楊雅菁　

攝影：張錦昌　

查詢電話：2623 0396