傳奇OG Ma殺入香港？
但凡任何一件物件在市場上多人追捧，久而久之就會出現供不應求甚至炒賣現象。此現象在牛仔褲、波鞋與玩具界中可謂時有發生，但可以好似美國街牌Supreme咁長炒長有十幾年確實相當罕見，而更加罕見的是竟然有人靠炒賣Supreme成為潮界大紅人。講緊嘅咪就係於紐約唐人街專門炒賣Supreme的Unique Hype主理人OG Ma囉！佢個人形象與店舖發迹史一樣咁引人入勝，上月尾Unique Hype在IG暗示將會殺入銅鑼灣開店，無論係真或純粹炒作，大家都不妨花啲時間了解吓呢間傳奇炒舖！
潮流版《尋找他鄉的故事》
Unique Hype的成立，可當成係一個《尋找他鄉的故事》潮流版！話說1992年OG Ma（真名：Lam Xie）帶住兩個兒子從中國深圳移民到紐約，其中一位兒子Peter於1999年開始收集Supreme單品，之後輾轉去到2006年他就於紐約唐人街開設第一間Unique Hype炒賣潮物，不願露面的他叫自己阿媽擔任店長一職，替他出面處理店舖大小事務。最初店內主打炒賣Nike SB波鞋，到後來先慢慢主攻Supreme，可能因為OG Ma形象親切，而店內又絕無假貨，所以好快就於紐約潮界佔一席位，而顧客亦為這位潮媽改咗OG Ma呢個稱號（Original代表正貨，Ma是媽的譯音）。
闖出名堂
經過十多年營運，Unique Hype現時已經發展至每年營業額過百萬美元，IG Followers接近18萬，每個Post閒閒哋都有過千人畀Like，去年尾更開設網店，規模已非一般無名炒賣小店。好多最搶手Supreme新貨於每個星期四上午於實體店及網店發售並極速Sold Out之後，下午就已經出現於Unique Hype店內，而且往往唔係一件半件，講緊係十件起的貨量。
據說Unique Hype早期主要以一百美元日薪僱用數十人排隊入店為其買貨，而Peter亦曾透露與Supreme店員關係友好，所以比較容易得到相對穩定的貨源。即使部分單品滯銷亦絕不減價，改為向日本市場轉售，造就出較大炒賣空間。所以即使後來有不少人加入炒賣Supreme行列，Unique Hype仍然坐擁龍頭地位兼保持相當利潤。
明星效應
雖然Unique Hype最出名係返貨快又齊，但其實之前一直只係喺Supreme Fans口耳相傳先識得「捐窿捐罅」走去幫襯。但自從2014年開始，Wiz Khalifa、Travis Scott、Kylie Jenner及Joe La Puma等潮人先後到訪後，店舖人氣就直線飆升。近期「客仔」則有Juice Wrld、J.Balvin、Ron Weasley及Higher Brothers等人。
撰文：賴文曦
查詢：（A）www.uniquehypenyc.com、（B）2608 9228、（C）2770 1727