Girl's Secret!解構女生攝影團

明天是三八婦女節,名正言順「女人大晒」,女士們除了喜歡行街、買嘢、High Tea之外,原來有班女生仲鍾意組團影相。究竟這班只供女士參加的攝影團搞邊科?Girl's Talk會講啲乜影啲乜?一於請香港首間女子攝影學校「文藝女生」創辦人Iris Cheng,解構女生攝影的秘密。

作品情感先決

Iris初學影相時,同不少人一樣會上攝影班,可是聽極都聽唔明阿Sir講乜,後來掌握了攝影技巧,萌起建立一個畀女仔學影相的平台,因此成立了「文藝女生」。Iris解釋:「好多女仔都理解何謂光圈、快門、ISO,只是未必懂得混合使用。我知道初學者心態,會用淺白有趣方式介紹攝影概念,加上出外組團實習,便能以手動模式和各種技巧玩出屬於自己的作品。」

據她觀察,男士影相大多器材先決,影友聚會時會討論相機性能、鏡頭成像等話題,拍攝時勇於挑戰高難度;相反全女班影相對器材的需求不高,拍攝以情感行先。「由於女仔的思緒比較跳躍,因此拍攝出來的作品都幾抽象和Moody,希望與別人分享。」

鍾意手機影相

很多影會都舉辦人像攝影團,邀請「女模」畀人圍影,唔好以為女仔攝影團會掉番轉影「男模」。Iris笑說:「其實我哋都係影女仔,不過唔係模特兒,而係一眾學員互相拍攝人像作品。由於拍攝者和被攝者都是女生,所以表現會更加自然。」外影則會設定不同主題作功課,「例如之前以『致童年』為主題,要學員拍攝現在與小時候的對比照;另跟古着服飾店合作,讓大家借衫出去影相,相信全男班未必會有類似題材。」

至於器材方面,Iris認為女士們鍾意用手機影相,「女仔拎單反大機比較吃力,所以主要用無反或手機影相。」不過她補充,在電腦放大相片的話,始終是相機的質素佔優。

「文藝女生」Profile

成立於2011年2月14日,是香港首間女子攝影學校。課程以女性角度出發,除了教授攝影技術,更着重認識美學,分享日常生活看法。
網址:www.feminart.hk

撰文:黎子豪(部分相片由受訪者提供)