紅魔鬼×時尚界聯乘賀……聖誕？
上星期曼聯宣布炒莫連奴魷魚震驚球壇，不止曼聯迷要請小鳳姐出場慶祝，連跟他鬧不和的「紅魔」球員保羅普巴，都忍唔住立即在IG帳戶上Post文暗寸（不過出Post不到10分鐘就刪貼）。另一邊廂，Paul Smith亦聯同保羅普巴、迪基亞及安東尼馬迪爾齊齊聯手慶祝……與曼聯合作推出別注配飾系列。
兩「紅」相遇再合作
其實Paul Smith自2008年開始已為曼聯職業球員設計官方西裝制服，今次兩大單位進一步提升合作關係，推出聯乘系列，當然以紅魔的紅色為主色，主打兩款印有曼聯復古圍巾及花形徽章相片印花圖案設計，產品包括手提電腦袋、小物袋（Wash Bag）、記事簿、皮革銀包、卡片套及iPhone 8保護套。
品牌又同時推出糅合曼聯球隊配色及Paul Smith經典條紋設計的羊毛圍巾及襪子。另外為配合西裝設計，更特別設計出兩款條紋款袖口鈕及配有曼聯會徽的領帶，並備有紅、黑兩色選擇。此系列於全球指定Paul Smith專門店、奧脫福球場Manchester United Megastore及其官方網上商店有售。全個系列以紅色設計，充滿節日氣息又易襯，各位曼聯迷大可入貨用來慶祝……聖誕！
撰文：朱寶茵
查詢電話：2730 7622