ToySoul雙色夜市男女都Buy

曾聽說「玩具，是女人最大情敵。」但女士們未「入坑」，可能是因為未有心儀目標啫！將於下周揭幕的亞洲玩具展ToySoul，除一如往年於首日6:00pm起開設「黑夜市集」，讓玩具迷收工後都買到限量版暗黑玩具；活動第二日6:00pm起更首度舉行「粉紅市集」，推出多款粉紅色系別注產品，例如漢堡歐搪膠、豆芽水產金目鯛公仔等，女士見到肯定心心眼。

「黑夜」及「粉紅」市集將於首日及次日6:00pm起舉行，方便上班一族收工後來掃貨。

玩出本土情懷

ToySoul向來是玩具設計師的Show Off平台，今屆吸引到50個單位參展，當中香港設計師力谷本土情懷，例如Kenny Wong以金魚街為靈感創作出大會吉祥物「魚童」；新進玩具商PLAY推出經典電影《殭屍先生》的Q版公仔；BigBoysToys首賣舞獅題材的「瑞獸勇者」等。不得不提還有Snail Product的1:13遙控巴士，全長84cm分量十足，並設有電動閘門及燈號，巴士迷記得入場朝聖。

瘋搶人氣玩具

其他單位亦不乏亮點，計有日籍美女設計師Hinata到場展出人氣角色「角貓」Morris，怪獸台北帶來仿木海綿寶寶Molly，龍家昇販售Labubu Rangeas公仔，Soap Studio為Get Animated聯乘人偶開訂等。為紀念《筋肉人》漫畫明年邁向40周年，工匠堂開發了一系列《筋肉人》香港別注公仔，展覽期間更會舉辦主題展，請來作者嶋田隆司首度公式訪港，粉絲想簽名就要提早排隊了。

「黑夜市集」的玩具全部黑麻麻，部分更是夜光，暗黑系收藏家又要破財！	去年入場人數的女性比例增加三成，今次「粉紅市集」特別為她們精選多款粉色系產品。	設計師Kenny Wong以金魚街為靈感創作出大會吉祥物「魚童」。
BigBoysToys「瑞獸勇者」開賣，同場仲有百獸王別注色發售。售價：$680/隻	PLAY推出《殭屍先生》Q版公仔，一套有元華及林正英兩個角色。售價：$280/套	Snail Product旗下1:13遙控巴士，識行仲識開門，像真度極高。售價：$15,800
怪獸台北帶來多款Molly公仔，例如仿木海綿寶寶及惡魔人等。	工匠堂《筋肉人》香港限定公仔，以黃色為主調，擺明向李小龍致敬！	龍家昇的Labubu Rangeas公仔，早前於台北限定店被瘋搶呢！