BMW 420iA GRAN COUPE-SPORT好動型象

近年的歐、日車價拉近了不少，願意付出四、五十萬元已有好多優質歐洲車揀，正如標榜型格及好動形象的BMW 4系Gran Coupe，最近便有出車優惠，當中的420iA Gran Coupe-Sport（F36 LCI）不僅追加LED頭/尾燈及手機無線充電裝置，推廣期內仲要平$123,900，現在不用$46萬就可做車主，係咪諗得過呢？

BMW 420iA Gran Coupe-Sport<br>售價：$459,900（推廣價）

BMW 420iA Gran Coupe-Sport
售價：$459,900（推廣價）

糅合好玩與實用

以四門轎跑定位的4系Gran Coupe，不僅結合房車、轎跑及揭背車元素，斜背的造型還凸顯出不甘從俗的品味，加上全車可載5個人，論實用性確比雙門Coupe強。與同門的Coupe及Convertible相比，四門的Gran Coupe無疑務實得多，唔止載得人多，載物空間亦更為充裕，尾箱容量可藉着翻平後座擴展至1,300公升，較五座布局下的480公升大2.7倍，連單車都放得落，轎跑車喎，點估得到呀？筆者認為，4系Gran Coupe是一部集好玩與實用的多功能車款，如果看膩了傳統的三廂式私家車，又唔想揸雙門Coupe被人話「趕絕外母」，各方面都有高度平衡，賣相及操控又帶跑格的Gran Coupe，也許是不錯的另類選擇。

運動化軚盤以紅線縫製，凸顯其跑格形象。

有4種選擇行車模式，節能與動感操控可隨時切換。

前後泊車感應配合後視鏡使用，泊車仲點會有難度？

內外滿載運動氣息

今次試駕的420iA Gran Coupe，是配上Sport Line Package，標準配備已包括18吋輕量合金軨、M Sport懸掛、黑色側鏡殼、Sport多功能軚盤及前排運動座椅，不論身處於車內或車外，都可感覺到強烈的運動底蘊，而額外追加的LED頭/尾燈更是錦上添花，型咗、又慳電咗，車價又平一大截，話唔吸引就呃你嘅。儘管4系Gran Coupe的車長只有4,638mm，比起長達5m的6系Gran Coupe短好多，起初還以為內籠會較窄，實際坐過卻是另一回事，好闊落又稱不上，但起碼坐後排都不會頂頭頂腳，基本上可當一般Sedan咁用。除此之外，推廣期內出車仲有無線充電板（QI標準）送，放低部電話就叉到電。手機唔支援無線充電？唔使愁，車內另備有2個2.1A USB插口，想叉乜都得啦！

座椅用上Dakota皮革包裹，帶來舒適的乘坐感。

後排設有獨立送風口，照顧到乘客需要。

後座椅背可向前翻下，將尾箱容量擴展至1,300公升。

馬力夠轉檔快捷

引擎就沿用2.0公升直四BMW TwinPower Turbo，420iA話就是入門，實力卻不能小覷，原廠公布的最大馬力、扭力輸出分別達184hp及270Nm，跑「零一」只需7.7秒，已經唔係話夠用咁簡單，揸落仲好好力。由於Sport Line的懸掛設定較硬朗，離地距亦降低了10mm，彎中穩定性及靈活度都不比雙門Coupe差多少，加上波箱反應快，又有軚盤加減波玩，玩樂指數相當高。當然，代理還提供性能更強的版本，440iA有326hp添，一分錢一分貨嘛，若論性價比，這部420iA Gran Coupe-Sport冇得輸。目前，代理已將雙區恒溫、電尾冚、導航、後泊鏡、天窗等列為標準配置。若有更高要求，另可選配主動式LED頭燈、19吋軨、高級音響及Surround View，足以滿足不同需要的消費者。