師情草意：走塑唔走素
近排潮流興走塑，走塑者，免卻塑膠是也。各大媒體大肆報導，以及環保意識急劇升溫，令到大眾對日常生活使用塑膠都會三思，但原來有啲情況，係唔走塑唔得，否則就真係走素！大家睇到呢度係咪覺得抓晒頭，究竟我講緊乜嘢？！同西藥草又有乜嘢關係呢？
其實我今日想同大家分享嘅係塑膠對西藥草質素嘅影響，西藥草嘅質素，除咗會被產地來源及種植方法影響，儲存方法嘅差異亦會改變佢哋嘅品質。眼見好多冇受過專業訓練嘅用家，由於對西藥草嘅儲存欠缺了解，並不當地選用塑料器皿，因而誤令西藥草嘅質素唔達標，感到可惜。所以今日我就會同大家講吓唔同類型及狀態嘅西藥草正確嘅儲存方法。
首先，我哋要留意嘅係西藥草嘅狀態，究竟自己手上嘅西藥草係新鮮？已被製乾？還是早已被製成粉狀？因為合適嘅儲存方法同西藥草嘅狀態有着密切嘅關係。一般嚟講，西藥草主要分為我啱啱所提及嘅狀態：1.新鮮、2.製乾、3.粉狀。
1.處於新鮮狀態嘅西藥草
但凡未經處理或新鮮摘下嘅西藥草，喺儲存之前，必須經過清洗乾淨，並用毛巾將佢哋盡量抹乾，再將佢哋置於室內平放吹乾。當吹乾過程完成後，我哋就可以準備一個大小合適嘅玻璃樽，預備將佢放入雪櫃進行儲存。一般嚟講，如香芹（Parsley）呢類草本植物，您只需將佢放入一個於底部注有小量水分嘅玻璃器皿，再放入雪櫃嘅任何一格，佢就可以視乎新鮮度，儲存大概一至兩個星期。但如果喺迷迭香（Rosemary），則只需用乾毛巾或抹手紙包好，放於雪櫃任何一格放置，鮮度可以保存約三星期。
2.經過製乾嘅西藥草
呢類藥草，通常係俾西藥草師用嚟配備方劑或用作家居茶方之用。因此，只需將製乾後嘅藥草放進密封嘅玻璃樽便可。
3.粉狀藥草
儲存方法基本上同經過製乾嘅西藥草大致相同。視乎個別情況，有啲西藥草師或會選擇放進食物級別嘅防潮包，延長保質期。
環保又保質，走塑新招，一箭雙鵰！
Alice Chan（陳雅詩）
（Reg. Psychologist）香港註冊心理學家
（Chartered Herbalist）加拿大特許西草藥師
M.Sc.（University of London）
High Dip. Pharma Tech.
Email：alice@wherbta.com
Dr. Bonita T.Y. Chan（陳德宜）
Registered Herbalist加拿大安大略省註冊西草藥師
（Nutritionist）營養學家
Ph.D（The Chinese University of Hong Kong）香港中文大學生化博士
前美國Baylor College of Medicine,Texas Medical Centre疾病機理研究員
前美國University of Pittsburgh疾病機理研究員
Email：bonitatychan@wherbta.com
網址：www.facebook.com/wherbta