Honda Vezel EX「瀛」格改動

在SUV百花齊放的時代，想揾部啱自己嘅車款都不是易事，就算將車價縮窄至僅限二字頭，隨口噏都有十部八部揀。汽車要得到顧客垂青，適時改款及升級當然少不了，就如日系本田（Honda）早前便帶來小改款Vezel，唔止賣相型仔咗，前座仲改用半桶櫈，擺明針對後生仔女而來。

售價：$253,880.1
Honda帶來小改款Vezel，設備更齊全。

半桶前座帶來驚喜

新Vezel的改動主要在外觀上，鬼面罩、頭唇以至仿進氣口都是重新設計，車頭廠徽亦直接放在電鍍飾件上，經過連串改動後，整體車長增至4,335mm（+40mm），觀感較改款前修長，配合全新的「Jewel Eye」大燈，賣相相當討好。前排一對半桶櫈可說是最驚喜的地方，不僅腰間及大腿外側有理想的包裹，用料亦不會如傳統Sport Seat咁硬，長途駕駛都一樣舒適。代理指，新Vezel有6種車色揀，當中有3種（Brownish Amethyst Metallic、Silver Mist Green Metallic及Midnight）是新色，色調都偏向深沉，低調得來又不失型格。

簡約車廂鋪排整潔

小改後的Vezel有LX及EX兩個版本，後者的設備較齊，多咗皮椅、真皮波棍、軚盤加減波、金屬腳踏、電鍍裝飾、車頂行李架及窗簾式氣袋等，車價只是多$14,000，精明消費者一定識揀。不論是Vezel LX或EX，現時出車仲可以免費升級至觸控式液晶體顯示屏音響系統及多角度後泊車鏡頭，不用$24萬起的售價確實吸引。車廂設計以簡約為主，中控台及波棍台的實體按鍵不足10個、鋪排整潔，整體布局亦充分考慮到用家需要，後座椅背不僅可翻平，甚至連座墊都可揭起，擺放高身盆栽都唔成問題，過年買盆桔返屋企都唔使Call貨Van啦！

車廂採用簡約設計，營造出和諧感。	前座改為半桶形設計，有更佳包裹性。	後排座墊可向上揭起，擺放高身盆栽都不成問題。
現時出車可免費升級至觸控式液晶體顯示屏音響系統，輕易便可與手機連接。	中控台整合了後泊鏡功能，倒車自然輕鬆過人。	尾箱可擺放大型行李篋，非常實用。

兼顧性能與節能

好多人揸車都試過刮花軨，尤其是左前輪，為減少這種情況發生，Honda特別在Vezel的左側鏡下方加入一個類似潛望鏡的裝置，駕駛者可透過鏡面反射原理查看車頭左前方地面的景象，車轆與路壆距離都睇得一清二楚，係咪好細心呢？動力配置就維持原來的1.5公升引擎及七前速CVT波箱，最大馬力、扭力輸出分別為131ps及155Nm，加速力雖未至於很強，但作為日常用車仍勝任有餘，原廠公布的油耗僅21.1km/L（JC08 H+C Mode），以現時油價計算亦只是8毫子1公里左右，性能與油耗取得很好平衡，啱晒啲實用型用家。