利是在手人人有禮
明天係初七「人日」，係全人類嘅生日，先同大家講聲Happy Birthday！剛過完農曆新年假期，相信大家都（手豆）咗不少利是，手頭自然鬆動。不如趁呢個開心大日子，買份生日禮物畀身邊人（或自己），氹吓大家開心？既然係送給至愛，當然不能太行貨，以下由編輯部推介的Gift Choices，由時裝、美容到配飾都有，應該可作大家嘅購物指標。仲等咩？起身去Shopping啦！
Levi's Vintage Clothing Menlo Cossack Leather Jacket $9,999（A）
基本上有買牛仔褲都會知LVC（Levi's Vintage Clothing）已經係最高質品證，今年LVC唔玩復刻牛仔褲改為推出復刻皮褸，最特別之處係設計完全參照早前品牌於佳士得（Christie's）拍賣會上所投得的愛因斯坦Menlo Cossack皮褸，採用頂級羊皮於意大利製造，全球限量500件（香港地區限量10件），仲要隨皮褸附上一瓶由紐約香水公司D.S. & Durga特別設計的香瓶，以模仿原版皮褸因為愛因斯坦長期抽煙斗所留下的氣味。如果「人日」收到呢件皮褸做禮物，你話幾開心呢！
PORTER×G-SHOCK DW-6900FS $1,790（B）
G-SHOCK系列手錶已推出超過30年，外觀設計與功能雖然不停進化，但對於好多錶迷嚟講1987年及1995年誕生的DW-5600及DW-6900，仍然係G-SHOCK入面最經典的方形及圓形設計。只要你發現大部分品牌與G-SHOCK聯乘合作都會揀呢兩個型號，就知有幾咁Must-have！日本國民袋牌PORTER今年就再次與G-SHOCK合作推出聯乘版DW-6900手錶，一身鮮橙色調取自PORTER Tanker系列袋款的內裡設計，其他細節如錶上按鈕及金屬扣則採用黑色Ion Plating點綴，錶身各處亦有PORTER、YOSHIDA & COMPANY字樣及PORTER Bellboy圖案，加埋個靚靚迷彩鐵罐錶盒，留番o黎做迷你全盒都仲得！
HELMUT LANG黑色亮面塗層乾濕褸 約$8,500（C）
過完農曆新年，意味着春天正式來臨，在這個乍暖還寒又經常雨濕濕的季節，潮人最需要就是一件乾濕褸！提起乾濕褸，大家印象中就是最經典的駱駝色，除了這傳統設計外，唔少品牌都會不時為它搞搞新意思。HELMUT LANG這件黑色亮面塗層乾濕褸就讓我更心動，具光澤感的亮面不但令人眼前一亮，加上金屬扣眼腰帶和領位鎖扣等細節，傳統中又帶點Glam Rock味，穿起來更Cool更有型。
Valextra Folder手袋 約$24,800 + PVC手袋保護套 約$1,065（D）
大家都知女人愛手袋如命，在落雨天挽着的靚手袋被滴濕都咪話唔心痛。以耐看實用見稱的意大利手袋品牌Valextra，貼心地推出了PVC手袋保護套，可避免雨水弄濕皮革出現水漬，保護套採用了透明膠料，絕對不會影響女生大晒手袋的心理。今個春夏PVC又是熱門材質，套上保護套後令原本外形端莊低調的手袋更有味道，兼多了一點型格。
Calvin Klein簡約雙色手鈪 $900（I）
誇張配飾不是人人可以Carry得到，反而看似簡單的配飾，戴上後可為裝束生色不少，添上一分Dress Up感覺。以簡約見稱的Calvin Klein新季推出不少線條簡潔利落的配飾，如這款Calvin Klein Double手鈪，便採用重疊交錯的設計，以PVD鍍玫瑰金配搭精鋼，在色彩及質感上大玩對比元素，容易配搭。
Sea New York牛仔乾濕褸 $6,190（H）
乾濕褸是男女衣櫃內的必備服飾，加上春天天氣乍暖還寒，送上乾濕褸絕對是型格又實用之選。由設計師Monica Paolini和Sean Monahan創辦的Sea New York，將乾濕褸及牛仔褸設計結合為一，不但令經典的乾濕褸型上加型，更非常迎合春夏季的Denim熱潮。
Kiehl's好事成雙護膚套裝 $590（F）
這套裝有我喜歡的特效補濕乳霜，而且最驚喜的是一套有兩盒，絕對好事成雙！加埋金盞花植物精華爽膚水、潔面啫喱和補濕導入精華，就算冇人送畀我，買嚟送畀自己都相當實用！
LANCÔME新年限量升級版嫩肌活膚精華肌底液套裝 $1,555（E）
品牌一改以往黑色為主的形象，特別推出在香港首次發售的紅噹噹新春賀年限量升級版嫩肌活膚精華肌底液，以及旅行裝的緊緻日霜、晚霜和精華等等，照顧周到，可以幫我在新春聚會或外出旅行時保持肌膚狀態，如果人日生日收到這份禮物也不錯啊！
Saint Laurent Tie-dye Varsity Jacket $21,900（K）
要打扮搶眼其實有很多方法，唔一定獨沽一味玩紅色，玩七彩配搭一樣掂，就算連男士都可以一試。由法國Saint Laurent Menswear推出的Varsity Jacket，以100% SILK的處理方法製作，並運用漸變方法將多種顏色融入其中，因此Jacket上的各種顏色並無明顯分界，配合埋黑色偽油漬點綴，Eye Catching得來又極具粗獷味道和時尚感，如果人日生日收到應該會好開心！
Richard Quinn Asymmetric Floral Print Dress 約$25,000（J）
生日當然要着得出位啲，作為時裝人要出位唔止要Outstanding，就連揀嘅品牌亦要出位過人！淨係識得買啲係人都知係人都識嘅品牌，即使價錢再貴，都唔算好威囉！今次介紹嘅Richard Quinn就係一次過滿足你兩個願望嘅品牌，去年創辦人仍就讀Central Saint Martins MA時，作品已被Lady GaGa睇中，並邀請其為她製作服飾。急速冒起全因擅長以舞台式的立體剪裁為軸心，而且精於結合形形色色的瘋狂Full Pattern，當中尤以Floral Print最為經典。圖中這條Asymmetric Floral Print Dress的不規則剪裁便處理得相當出色，花卉圖案更帶點點和風情懷，送畀時裝精女友最適合不過。
Rebecca Minkoff心形鏈袋 約$2,253（D）
人日當然最好收到實用和時尚兼備的禮物，心水之選有Rebecca Minkoff紅色心形鏈袋，心形設計代表心心相印，又Sweet又可愛，而且紅色又夠喜氣，日日用分分鐘有催旺作用，唔錯呀！
Chloé心形太陽眼鏡 未定價（G）
所謂物輕情意重，如果未諗到送咩禮物給至愛，不妨送一副Chloé心形太陽眼鏡，以物傳情，以粉紅色心形鏡片代表你的愛意，夠哂窩心啦！
撰文：潮流組
查詢：（A）2506 3505、（B）2321 6733、（C）www.net-a-porter.com、（D）www.farfetch.com、（E）2196 8321、（F）2831 8973、（G）2807 1101、（H）2234 7880、（I）2510 5260、（J）www.hlorenzo.com、（K）www.ysl.com