BMW X1 sDrive18iA足料家用

近年歐洲車嘅價錢與日本車已拉近不少，尤其是入門版本，個價有時仲抵到你唔信，好似寶馬（BMW）最近引入的X1 sDrive18iA，車價竟然唔使$36萬，仲有大天幕、電尾門等豪華配置，加上百公里油耗僅5.5公升，想平揸寶馬SUV作為家庭車，機會嚟喇！

BMW X1 sDrive18iA
售價：$359,900

主打實用與節能

X1 sDrive18iA的定位是小型SAV、沒搭配四驅，主打實用及節能。相比起上代，現行（F48）X1更為闊落，不但頭頂及肩膊空間充裕，整個後排甚至可前後移動多達13cm，乘坐及載物空間的分配可自行調節，想腿部有更多伸展空間，把座椅移後就得，So Easy！同時，後排座椅能夠以40:20:40的比例獨立摺疊，喺尾箱側壁撳個掣，後座椅背就會自動向前收合，三兩秒間便可將行李箱容量擴展至1,550公升，擺放營具、滑水板以至小型單車等運動裝備都不成問題，加上地台底另設儲物格，多多雜物都可輕鬆收納。

多功能軚盤以皮革包裹，惟未設加減波。

只要在尾箱側壁撳個掣，後座椅背就會自動向前收合。

中排座椅可前後移動多達13cm，空間分配更靈活。

導入Turbo加速力強

頭冚下的引擎為1.5公升三缸，容積雖小，但導入BMW TwinPower Turbo後，性能卻不能小覷，220Nm的扭力更可媲美甚至超越2.0公升NA車，波箱仲要升級至七前速雙離合器配Steptronic，轉波都爽過人，廠方公布0~100km/h的時間只需9.6秒，估佢唔到呢？X1的離地距只較一般私家車升高一點，駕駛感其實似Hatchback多過SUV，車身搖晃亦不會很大。不過，以FF設定的X1 sDrive18iA並不能給你如1系Hatchback的操控快感，開起來就是四平八穩、少了些BMW的熱血。事實上，入門SUV又不能要求得太多，要激情就買X5 M或X6 M，但前題是閣下要有咁嘅財力。

揭起尾箱地台板，還有額外的儲物空間。

引擎只有三汽缸，動力輸出一點也不弱。

標配設備齊全講究

X1 sDrive18iA話就話是入門版，但設備並冇想像中咁齋，雙區恒溫、iDrive、後泊鏡、以至Performance Control均為標準設備，操控性能及乘坐舒適性都兼顧得到，加上天幕面積幾乎覆蓋整個車頂，不論身處前或後排都可享開揚視野，載滿人也沒有半點侷促感。此外，新車同樣預載了Driving Experience Control，引擎、波箱及油門反應會因應不同模式（Sport、Comfort及ECO PRO）自動調節，從而提供動感、舒適或節能的行車表現。儘管X1 sDrive18iA不適合越野，但功能性始終比Hatchback強，載物多咗、離地距又高咗，作為家庭車絕對稱職。